RSTV NEWS.Qaramada Midoobey ayaa sheegtey in Soomaaliya ay hadda haysato fursad Nabadeed.

Qaramada Midoobey ayaa sheegtey in Soomaaliya ay hadda haysato fursad Nabadeed.

Xoghayaha Guud ee QM Bam Ki-Moon ayaa markii ugu horeysay warbixin ku saabsan Soomaaliya ka hor akhriyay golaha Ammaanka ee Q/Midoobay, wuxuuna sheegay in Soomaaliya heysato fursad fiican oo ay ka faa'iideysan karaan Soomaalida haddii ay taageeraan qorshaha ciidamada nabad ilaalinta Afrika

Xogyaha Guud ee Qaramada Midoobay ayaa ballanqaaday in Qaramada Midoobay ay sii wadayso taageeridda dowladda iyo bulshada rayidka ah si wax looga qabto dhibaatooyinka hor istaagi kara nabadda.
Isagoo intaasi raaciyay in wadahadal loo dhan yahay iyo qorshe siyaasadeed dhab ah oo kaliya lagu gaari karo nabad waarta, kana hor istaagi karta kooxaha aan qanacsanayn in dagaal xal ku raadiyaan, taasoo uu sheegay inaanay Soomaalida dan u ahayn.

Bam K-moon waxaa kale oo uu sheegay in markii midowgii maxkamadaha meesha laga saaray ay soo cusboonaadeen cadaawadii ka dhaxaysay iyo is qabqabsiga qabaa'ilkii ay maxkamaduhu gacanta ku hayeen, dowladda ku meelgaarka ahna waxaa wali sugaya in ay awoodeeda meelmariso xasilooni iyo kala dambaynna ku soo celiso magaalada Muqdisho iyo xarumaha kale ee dadwaynuhu ku badan yihiin.

Xoghayaha Guud ee Qaramada Midoobay, wuxuu carabta ku adkeeyay in ay dowladda federaalka ku meelgaarka ah ay waajib ku tahay in gacmaha u fidiso siyaasiyiinta muhiimka ah iyo xoogaga bulshada Soomaaliyeed ayna ka qaybgaliso wadaxaajood loo dhan yahay, isagoo aan soo hadal qaadin Maxkamadihii meesha laga saaray.

Si kastaba ha ahaatee Qaramada Midoobey ayaa wakhtigan u muuqata in ay muhiimad gaar ah siinayso arrimaha Soomaaliya iyadoo marar badan ku celcelisa in loo hogaansamo qorsha nabadda ee ay horssedayaan wadaamada ku jira midowga Afrika.

RSTV NEWSROOM

Newsroom@rstvonline.com