Wareysi ku saabsan arrinta uranka dhalisey ee guddiga doorasha ee soomaaliland

Komishanka xaasha’e kursi jacayl waa ka reebban yahay oo xaaraan buu ka yahay, qofka Komishanka ku tilmaama kursi jacaylna waa qof aan waxa uu qabto iyo waxa ay tahayba aqoon.” Sidaa waxa yidhi Md. Axmed X. Cali Cadami, Guddoomiyaha Guddiga Doorashooyinka Qaranka ee waqtigoodii dhammaaday, balse aanay sharciyan caddayn shaqo-ka-tegistoodu.


Mr. Cadami oo xalay u warramayey telefishanka madaxbannaan ee Hargeisa Cable TV (HCTV), waxa uu si cad ugu faahfaahiyey arrimo dhowr ah oo la xidhiidha muranka sharci ee ka dhashay qaabka loo maray xil-wareejinta Komishanka, saamaynta khilaafkaasi ku yeelan karo kaalmooyinkii dhaqaale ee deeq-bixiyeyaashu Somaliland ku siin jireen doorashooyinka iyo mowqifka Guddigooda ee ku wajahan xal-u-helidda murannada sharci ee dalka ka aloosan.


Haddaba, su’aalaha la weydiiyey Md. Axmed X. Cali Cadami iyo jawaabaha uu ka bixiyey waxay u dhaceen sidan:


Su’aal: Guddoomiye; Madaxweynuhu wuxuu idinku eedeeyey in aad sii joogitaanka xafiiska sii jeclaysanaysaan, arrintaa maxaa ka jira?


Jawaab: Komishanka xaasha’e kursi jacayl waa ka reebban yahay oo xaaraan buu ka yahay, qofka Komishanka ku tilmaama kursi jacaylna waa qof aan waxa uu qabto iyo waxa ay tahayba aqoon. Komishanku shaqo-raadis ma aha ee waa karaamo-raadis, waa sharaf-raadis, haddii sharaftaada iyo karaamadaada la dilana noloshaadu waa xaaraan, in aad dhimato ayaana ka fiican. Hay’adaha sharci-dejinta ayey u taallaa si alla sida uu ku dhammaado ee ugu dhakhsaha badan ayuun baa la wada sugayaa.


S:Mar aannu [HCTV) warraysanay Wasiirkii hore ee Arrimaha Gudaha, waxa uu sheegay in ay caddaalad-darro badan ka tirsanayeen UDUB ahaan Komishanka xilligii doorashooyinka, markaa ma laga yabaa in waxyaabaha dhacayaa daba socdaan caddaalad-darro la idinka tirsanayey?


J: Waxa la yidhaahdaa caddaaladda bani’aadamku ma dhammaystirna, laakiin hawshii dhacday iyo waxay ku dhammaatay haddii ay caddaaladi jirtay iyo haddii caddaalad-darro jirtayba ilaa goob-joogayaashii ayaa ka marag-kacay oo sheegay oo ka daba tegi maayo. Waad ogtahay xataa waqtiyada qaar uu nabadgelyada Komishanku halis galay, marka aad eegto sida ay hawshooda u gudaneyeen. Bal ka warran haddii adigii 80-ka cod ku helay doorashadii aad cabanayso, maxaad u malaynaysaa kii 80-ka cod lagaga guulaystayna? Muxuu yeeli karaa oo ku caban karaa way adag tahay baan aaminsanahay. Markaa ninkii guusha qaatay anigu cabashadiisa ma dhegaysan karo.


S: Guddoomiye; waxaad hore u sheegtay in arrimaha dhacay ay dimoqraadiyaddii Somaliland meel kaga dhacayaan, taasi ma dhacday, mise ma dhicin?


J: Way dhacday. Uma aaminsani in ummad aan dareen lahayni ku dhaqan tahay waddanka, waanan ku dhashay, waan ku koray oo waan ka shaqeeyey, qofkii u qaata in aanay dareen lahayn oo wax kasta la samayn karo waa ku sirmayaa, laakiin asbaabo badan awgeed shacbigani wax buu dhawrayaa, dhibaatooyin badan baa soo maray, dhibaatooyinkaa sidaan isleeyahay waad kaga soo kaban kartaana waa nabadgelyo iyo dimoqraadiyad waarta oo la helo. Waxaan leeyahay shacbigaa Ilaahay himiladooda ha u rumeeyo oo ha gaadhsiiyo.


S: Waxa beryahan dambe warbaahintu qoraysay in Midowga Yurub doonayo in uu hakiyo caawimooyinkii uu dalka siin jiray, isaga oo sabab uga dhigay arrimaha khilaafka dalka ku soo kordhay, maadaama uu idinka [Komishanka] xidhiidh wanaagsani idinka dhexeeyo ma kala hadasheen arrimahan Midowga Yurub?


J: Wallaahi; xidhiidhku waa caadi oo maanta adduunka marka xataa telefoonno laga yimaaddo internet-ka ayaad tegi kartaa oo waxa aad doonto ayaad ku dalban kartaa, laakiin arrintaasi xasaasiyad bay leedahay oo xataa jaraa’idka iyo TV-ga ku celcelintiisa midna ma wanaagsana, oo dadkani wax badan buu u harraadan yahay, oo dimoqraadiyad ayuu u harraadan yahay, caddaalad ayuu u harraadan yahay, shaqo wanaagsan ayuu u baahan yahay…….. Anigu [Cadami] waxaan leeyahay qodobkaa TV-ga iyo jaraa’idkaba ha laga ilaaliyo, waana runtii arrin aad xasaasi u ah, dalkuna caawimo aad iyo aad ayuu ugu baahan yahay, welibana hawlaha qaar haddii aan taakulo dibadeed oo cilmi iyo dhaqaale ahba la siin waxba ma kala soconayaan.





Jamhuuriya Online
 

RSTV NEWSROOM

Newsroom@rstvonline.com

© RSTV 2007. All Rights Reserved