Kulan looga hadlayo abaaraha ka taagabn maamul goboleedyada Somaliland iyo Puntland, iyo koofurta Somalia oo ay soo qaban qaabisay dawladda Federaalka Somalia garabka ku sugan magaalada Jowhar, ayna maal gelinayaan Baanka aduunka iyo hay'adda horumarinta UNDP ayaa maanta ka furmay Hotelka Mansoor ee magaalada Hargeysa ee xarunta maamulka Somaliland.

Kulankan oo ah mid u muuqdo isku soo dhawaasho dhex mara madaxda Soomaaliyeed ee afkaaraha ku kala gadisan ayaa waxaa looga dooday suurto galnimada sida hay'adaha samafalka ay ugu gurman karaan abaaraha dadka abaaruhu ay ku heystaan dhulalka ay ka arimiyaan maamuladan.

Wasiirka Beeraha maamulka Somaliland ayaa waxa uu ku eedeeyay hay'adihii kulankaasi soo qaban qaabiyay in ay wadaan qorshe ay doonayaan in ay isugu keenaan madaxda Somalia, iyadoo madaxdii hay'adaha ee kulankaasi ka qeybgalay ay meesha ka saareen in kulankaasi uu yahay mid ku saleysan isu keenida madaxda Soomaalida, iyagoo sheegay in ay tahay in laga hadlo baahida loo qabo gargaar deg deg ah oo lasoo gaarsiiyo dadka macluushu ay iminka heysato.

Kulankaan ayaa waxa uu ku soo beegmay xilli qeylo dhaan baahsan ay kasoo yeerayso dadka ku dhaqan gobolada koonfureed ee dalka iyo qaar ka mid ah gobolada waqooyi ee Soomaaliya .

Maxamed Cadde.

RSTV Muqdisho