Wasiir ku xigeenka wasaarada waxbarashada dawlada federaalka KMG ah ee Soomaaliya Muqtar Maxamed Yuusuf ayaa maanta soo gabagabeeyey siminaar muddo 20 cisho ah uga soconayey xarunta dugsiga Xamar ee degmada Wardhiiglay macalimiin wax ka dhigta dugsiyada gobolka Banaadir.

Siminaarkan uu maanta soo gabagabeeyey wasiir ku xigeenka waxbarashada ayaa waxaa looga hadlayey cudurka Aidiska iyo qatarta uu caalamka ku hayo ayadoo macalimiin kor u dhaafaysa boqol ay siminaarkaasi ka qeyb qaadanayeen.

Muqtar Maxamed Yuusuf oo siminaarkaasi hadal ka jeediyey ayaa sheegaya in loo baahanyahay siminaar ceynkan oo kale in lo qabto macalimiinta gobolka wasaaradiisuna ay taageerayso siminaarada noocan oo kale ah isagoo ku nuuxnuuxsaday in siminaarkan lagu soo wargeliyey wasaaradiisa qabanqaabadiisa.

Muqtar Maxamed Yuusuf ayaa sheegay in macalimiintii ka qeyb qaadatay siminaarkan looga fadhiyo in ayana ay u gudbiyaan bulshada ay wax baraan si markaa cusurkan uu u noqdo mid shacabka oo dhan uu yaqaano dabadeedna digniin culus uu ka bixiyo.

Sidoo kale mas'uuliyiin fara badan oo ka socotay hay'adda siminaarkan soo qabanqaabisay o lagu magacaabo Solfa ayaa xafladii maanta lagu soo gabagabeynayey siminaarkan hadalkan ka jeediyey ayagoo u hambalyeeyey macalimiintii siminaarkan wax ka faa'ideysatay.

Si kastaba ha ahaatee siminaarada noocan oo kale ayaa maalmahan kusoo badanaya magaalada Muqdisho .

Maxamed Cadde.

RSTV NEWS ROOM