Col.Cali Xaaji Geeddow oo loo Yaqiin (Cali Weyne) kana tirsanaa saraakiisha Soomaaliyeed ayaa maanta lagu dilay deegaanka Galgalato ee duleedka degmada Kaaraan ee magaalada Muqdisho.

Goobjoogeyaal ayaa sheegay in Corneelka aan dilka loogu tala gelin balse ay rasaas kaga fakatay mid ka mid ah maleeshiyooyin uu leeyahay ganacsade Bashiir Raage, waxayna xilliga ay xabbada ku dhufteen ay sheegeen maleeshiyada in ay wadada furayeen.

Wararka qaar ee soo baxaya ayaa sheegaya in dilka ninkaan sarkaalka ah ay ka danbeeyeeb xilii gaarigii uu watay ay ku timid cillad xagga farsamada ah ayna maleeshiyooyinkan ay ku amreen in gaariga uu ka dhaqaajiyo goobta laakin nasiib darro waxaa wada socday hadalka iyo xabadda ay rideen kooxahaan maleeshiyooyinka ah ee iyagu ka amarqata ganacsade Bashiir Raage Shiiraar

Inta badan maleeshiyooyinka taabacsan hoggaamiyeyaasha hubeysan ee Muqdisho ku sugan ayaa waxaa caado u ah in xilliyada ay wadooyinka xiran yihiin ay ku furaan rasaas aan loo kala meel dayin oo mararka qaar ay dhacda in dad badani ku waxyeeloobaan.

Dhinaca kalena waxaa Muqdisho lagu dilay isla maanta sarkaal katirsanaa ciidanka booliska Soomaaliyeed oo la oran jiray Maxamed Xasan Maxamed (caddaawe), iyadoo aan la ogeyn isna sababta loo dilay.

Dilka saraakiisha ciidanka booliska ayaan aheyn mid ku cusub magaalada Muqdisho iyadoo horey loo dilay rag sar sare oo ka tirsan ciidanka booliska Soomaaliyeed.