Ra’iisal wasaaraha dawladda fedaraalka kmg ah ee Soomaaliya Cali Maxamed Geedi ayaa maanta dib ugu soo laabtay magaalada Baydhabo ee xarunta DFKMG ah ee Soomaaliya , ka dib muddo 3 cesho ah oo uu ku sugnaa magaalada Nairobi ee xarunta dalka Kenya.

Ra’iisal wasaare Geeddi oo ay ku wehliyeen imaatinkiisa xubno ka tirsan dawladdiisa ayaa si diirran loogu soo dhaweeyay garoonka diyaaradaha magaalada Baydhabo, waxa uuna ra’iisal wasaaraha u gudbay aqalka uu ka degan yahay magaalada, isagoo u sheegay saxaafadii halkaasi kula kulmay in uu daalan yahay, balse uu qaban shir jaraa’id uu kaga hadli doono socdaalkiisa.

Geeddi ayaa intii uu joogay magaalada Nairobi kulamo kula yeeshay masuuliyiin ka socotay hay’adaha QM, deeq bixiyayaasha, isagoo kala hadlay sidii loo saacidi lahaa dawladda, waxa uuna ka codsaday ra’iisal wasaaraha hay’adaha QM in ay xarumo ka furtaan magaalada Baydhabo oo iminka xarun ku meel gaara u ah dawladdiisa.

Maalintii axada ayay ahayd markii ra’iisal wasaaraha iyo wafdi uu horkacayay ergayga xoghayaha guud ee QM Kjel Magne Bondevik ay u ambabaxeen degmada Waajid, kadibna ay uga sii gudbeen magaalada Nairobi.

Maxamed Cadde.

Xafiiska Muqdisho.
RSTVonline.com