Maamulka xarunta Ibnu Baaz ee magaalada Muqdisho ayaa maanta deeq lacageed ku wareejiyay guddiga gurmadka abaaraaha si loogu caawiyo dadka abaaruhu ay ku hayaan qeybo kamid ah dalka Soomaaliya.

Maamulaha markazka Ibnu Baaz ee magaalada Muqdisho oo ka hadlay xafladii kadhacday xarunta Ibnu Baaz ee magaalada Muqdisho ayaa sheegay deeqdan lacageed in ay iska soo uruuriyeen haweenka wax ka barta markazka oo u damqaday walaalahooda ku tabaalaysan gobollada koonfureed ee dalka Soomaaliya.

Gudoomiyaha guddiga gurmadka abaaraha Sheekh Axmed Max'ed Sulaymaan oo ka hadlay munaasabadii maanta deeqdaas lagu gudoonsiinayay guddiga gurmadka abaaraha ayaa uga mahad celiyay maamulka Ibnu Baaz kaalmada lacageed oo gaaraysay 4160 kun oo shilin Soomaali ah oo ay ugu deeqeen walaalahooda abaaruhu ku hayaan qeybo kamid ah dalka Soomaaliya, waxa uuna ugu duceeyay in Allaah uu ugu badalo sadaqadii ay la baxeen wax ka khayr badan .

Dhanka kale Sheekh Axmed Max'ed Sulaymaan gudoomiyaha guddiga gurmadka abaaraha waxa uu sidoo kale sheegay guddigii ay u direen gobolka Gedo oo todobaadyadii lasoo dhaafay kormeerka ku marayay halkaasi dib in ay ugu soo laabteen magaalada Muqdisho, isagoo tilmaamay in ay qaban doonaan guddigaas shir jaraa'id uu ku qaban doono xarunta guddiga gurmadka abaaraha kaasoo uu kaga hadlayo dhibaatooyinkii abaareed ee uu kusoo arkay gobolladii uu booqday.

Waxa uuna intaa kudaray sheekh Axmed in ay soo bandhigi doonaan xaalada dadka ku dhaqan gobolladaas abaaraha ay ku dhufteen iyo waliba waxyaabihii guddiga gurmadka abaaraha ay ka qabteen.

Maxamed Cadde.
RSTV MOGADISHU