(Thursday March 23, 2006)  Wafdi uu hogaaminayo gudoomiyaha baarlamanka Shariif Xasan Sheekh Aadan ayaa galabta kasoo dagay garoonka diyaaradaha ee magaalada Baydhabo, iyadoo halkaasi ay kusoo dhaweeyeen qaar ka mid ah xubnaha dowladda fedaraalka kmg ah ee Soomaaliya iyo masuulyiinta gobolka Bay iyo dadweyne aad u fara badan.

Wafdigan uu horkacayay gudoomiyaha baarlamanka oo kasoo duulay magaalada Nairobi ee xarunta dalka Kenya ayaa waxaa kamid ah wasiirka beeraha Xasan Max’ed Nuur Shaatiguduud oo dhawaan magaalada Sanca ee wadanka Yemen uga qeyb galay shir ay ku yeesheen wasiirada beeraha ee wadamada bariga dhaw iyo dalal kale oo lagu casuumay oo ay ku jirtay Soomaaliya, wasiirak haweenka iyo arrimaha qoyska Fowsiyo Sheekh Max’ed, wasiirka macdanta iyo biyaha Max’ed Salaad Nuur, xildhibaan Axmed Ducaale Geelle (Xeef), xildhibaan Max’ed Cabdi Yuusuf iyo masuuliyiin kale oo ka tirsan dowladda. Waxaa sidoo kale wafdiga gudoomiyaha baarlamanka Shariif Xasan Sheekh Aadan ka mid ahaa ergayga dalka Talyaaniga u qaabilsan dalka Soomaaliya Mario Rafa’elli.

Shariif Xasan oo in dhawalaaba ku sugnaa magaalada Nairobi ayaa kulamo halkaasi kula yeeshay wakiilo kasocday beesha caalamka, madaxda urur goboleedka IGAD iyo masuuliyiin kale, isagoo sidoo kale lagu casuumay kalfadhiga baarlamanka dalka Kenya oo uu ka qeyb galay. Soo laabashada gudoomiyaha baarlamanka iyo wafdigiisa ayaa kusoo beegmay xilli amaan darro ay kusoo korortay magaalada Baydhabo oo habeenkii 2aad lagu soo rogay bandow dhaqan galaya 10:00 fiidnimo, kaasoo soconayaa ilaa waaga uu ka dilaaco.

Maxamed Cadde.
RSTV NEWSROOM
MOGADIHSHU