Gudoomiyaha baarlamanka Shariif Xasan Sheekh Aadan oo xiriir dhinaca taleefanka ah la sameeyay madaxweynaha dalka Yemen Cali Cabdalla Saalax ayaa uga mahad naqay kaalinta uu ka qaatay geedi socodka nabadda iyo waliba dadaallada uu taageerada ugu raadinayo dowladda Soomaaliya.

Shariif Xasan ayaa uga warbixiyay madaxweynaha Yemen kalfadhigii baarlamanka ay ku yeesheen magaalada Baydhabo oo ah kii ugu horreeyay oo ay isugu yimaadaan baarlamanka gudaha dalka Soomaaliya tan iyo markii dowlada fedaraalka kmg ah ee Soomaaliya lagu soo dhisay magaalada Nairobi ee dalka Kenya, taasoo qeyb ka ah mirihii ka dhashay hishiiskii Cadan ay ku kala saxiixdeen 5tii bishii January madaxweynaha Soomalaaiya C/llaahi yuusuf Axmed iyo gudoomiyaha baarlamanka Shariif Xasan Sheekh Aadan.

Shariif Xasan waxa uu u sheegay Cali Cabdalla Saalaxl in baarlamanka uu sii wadi doono kalfadhiyada uu yeelanayo 4ta bilood ee soo socota, iyagoo ka munaaqashoon doona arrimo dhowr ah oo ay kamid yihiin dib u dhiska hay’adaha qaranka ee burburay iyo waliba midaynta shacabka Soomaaliyeed.

Gudoomiyaha baarlamanka ayaa carabka ku dhuftay in ay socdaan dadaallo looga golleeyahay sidii iskaashi iyo wada shaqayn uu u dhex mari lahaa golaha baarlamanka iyo golaha wasiirada si ay u gutaan howlihii loo soo doortay oo ah u adeegida shacabka Soomaaliyeed.

Madaxweyne Cali Cabdalla Saalax ayaa dhankiisa u xaqiijiyay dowladda Yemen in ay garab taagan tahay dowladda iyo shacabka Soomaaliya, isla markaana qeyb libaax ay ka qaadan doonto nabad kusoo dabaalida iyo dib u dhiska dalka Soomaliya.

Madaxweyne Saalax waxa uu mar kale ku celiyay baaq uu u jeediyay beesha caalamka, deeq bixiyayaasha, dowladaha carabta iyo kuwa saaxiibada la ah dalkiisa in ay bar bar istaagaan dowladda Soomaaliya, isla markaana ay ka qeyb qaataan dib u soo noolaynta hay’adihii qaranka ee burburay iyo dib u dhiska dalka Soomaaliya oo ay halakeeyeen dagaallo ahli ah 15kii sanadood ee lasoo dhaafay.

Maxamed Cadde.
RSTV NEWSROOM
Mogadishu