Xildhibaan Yuusuf Mire Seeraar ahna gudoomiye kuxigeenka isbahaysiga dooxada jubba iyo jenaraal Max’ed Nuur Galaal ayaa walaac ka muujiyay isbahaysi la magaca baxay la dagaalanka argagixisada iyo dhaq dhaqaaqyada Maraykanku kawadaan dalka Soomaaliya oo ay ku sheegayaan in ay kaga hortagayaan argagixisada hoyga ka dhigatay dalka Soomaaliya.

Xildhibaan Seeraar iyo jenaraal Galaal ayaa muujiyay in ay danaynayaan kulan in ay la yeeshaan masuuliyiinta safaarada Maraykanka uu ku leeyahay magaalada Nairobi ee dalka Kenya si ay ugu qanciyaan masuuliyiinta Maraykanka dib in ay u eegaan kaalmada Washington ay siiso isbahaysiga la magaca baxay la dagaalanka argagixisada.

Hadalka kasoo yeeray Xildhibaan Seeraar iyo jenaraal Galaal ayaa kusoo beegmaya, iyadoo ay isa soo tarayaan walaaca shacabka Soomaaliyeed ay kaqabaan dhaq dhaqaaqyada Maraykanka ay kawadaan dalka Soomaaliya.

Dowladda Maraykanka ayaa dalka Soomaaliya kawada kaalmo ay siinayso qaar kamid ah hogaamiye kooxeedyada Soomaaliyeed oo ku midoobay isbahaysi la magac baxay la dagaalanka argagixisada, kaasoo sheegtay in ay la dagaalami doonaan shisheeyaha ku dhuumaalaysanaya gudaha Soomaaliya ee ka faa’iidaysanaya dowlad la’aanta ka jirta dalka.

Maxamed cadde.
RSTV NEWSROOM