Muuse Suudi iyo odayaal beeshiisa ka tirsan oo isku mari waayey gacan siinta Bashiir Raage.

Wasiirka ganacsiga dowladda fedaraalka kmg ah ee Soomaaliya Muuse Suudi Yalaxow oo xubin ka ah isbahaysiga la dagaalanka waxa loogu yeero argagixisada ayaa waxa uu shalay kulan la yeeshay odayaasha dhaqanka ee Beeshiisa oo ka la hadlayay sidii ay u taageeri lahaayeen dagaalka isbahaysiga uu kula jiro maxaakimta islaamiga gobolka Banaadir iyo ganacsade Xaaji Abuukar Cumar Caddaan

 Odayaasha dhaqanka ee Beesha Daa'uud oo uu kasoo jeedo Muuse Suudi ayaa ku gacan sayray dalabka wasiirka ganacsiga oo ay ku tilmaameen mid aysan dan ugu jirin beesha, iyagoo sheegay in aysan doonayn ka qeyb qaadashada dagaalka ka socda magaalada Muqdisho. Odayaasha dhaqanka Beeshaas ayaa carabka ku dhuftay in xiligan aysan diyaar u ahayn in ay lug ku yeeshaan dagaallo sukeeyo oo ku salaysan diin la dirir, iyagoo xusay in ay qeyb ka qaadanayaan qaboojinta colaada kusoo korortay magaalada Muqdisho oo ay sheeegeen in ay saameyn ku yeelatay dadka rayidka ah oo ka barakacay xaafadahooda. Muuse Suudi ayaa kulankaas kala hoyday guul darro iyo niyad jab, kadib markii uu ku hungoobay qorshahii uu ku doonayay odayaashaas dhaqanka in ay ku taageeraan dagaalada isbahaysiga uu kula jiro maxaakimta islaamiga,

 iyadoo odayaasha dhaqankana ay ku wargeliyeen maleeshiyooyinka beesha in aysan ka qeyb qaadan dagaaalkaas oo ay sheegeen in uu ka salaysan qorshe dhan ka ah danaha beesha oo aan iminka diyaar u ahayn in ay huriyaan colaad hor leh oo ka dhacda magaalada Muqdisho. inta badan maleeshiyooyinka Muuse Suudi ayaa diiday in ay ka qeyb qaataan dagaalka ka socda duleedka magaalada Muqdisho, iyagoo fulinaya amarka odayaasha dhaqanka oo uga digay ciddii ka qeyb qaadata dagaalkaas in aysan wax u qaban doonin, taasoo keentay Muuse Suudi in uu waayo tiro fara badan oo ka tirsan maleeshiyooyinkiisa.

 Maxamed Cadde.
RSTV NEWSROOM
MOGADISHO