Gudoomiyaha maamulka siyaasada gobolka Shabeelaha dhexe maxamed Cumar Xabeeb Maxamed Dheere ayaa sheegay in uusan maamulkiisa ku sinnayn taageero uu hayo isbahaysiga la dagaalanka argagixisada ee uu minbar ama xubin buuxda ka yahay isbahaysigaasi isagoo amaanay wasiirada hubeysan ee magaalada Muqdisho kuna jira isbahaysigaasi.

Gudoomiyaha gobolka Shabeelaha dhexe Maxamed Cumar xabeeb ayaa shaaca ka qaaday in magaalada Jowhar aanay ahayn meel laga taageersanyahay dowlada kmg ah ee Soomaaliya.

Maxamed dheere oo ah hogaamiye awood ku leh gobolka Shabeelaha dhexe iyo magaalada Muqdisho ayaa sheegay in xiriirka xumaaday ee u dhaxeeya isaga iyo madaxweyne C/laahi Yuusuf uu sabab u yahay madaxweyne C/laahi Yuusuf oo uu sheegay inuu yahay qof aan si mas’uuliyadi ku dheehantahay u dhaqmaynin.

Maxamed Dheere oo wareysi siiyey mid ka mid Idaacada Muqdisho ayaa sheegay in magaalada Jowhar ay tahay meel aan laga taageersaneyn dowladda Somalia waxaana uu ku hanjabay in mar dambe Shabeelaha Dhexe aaney iman Karin mas’uuliyiin sheegta in ay ka tirsan dowlada federaalka kmg ah ee Soomaaliya .

“Jowhar ma ahan meel laga aqoonsanyahay dowlada kmg ah,mana iman karaan mas’uuliyiinta dowlada xitaa wado ahaan uma soo mari karaan” ayuu yiri Maxamed Dheere oo intaasi ku daray “madaxweyne Yuusuf ma ahan qof u dhaqma sida madaxweyne oo kale ,haatan Baydhabo ayey diiradiisa saarantahay oo uu doonayaa inuu ka faa’ideyso”.

“Madaxweyne C/laahi Yuusuf iyo ciidamadii uu ka keensaday Puntland ma aysan muujin tixgelin ku aadan soo dhaweyntii ballaarneyd ee aan u samaynay,marki ciidankii Puntland ay Jowhar ka tagayeen xitaa ma aanayt na war gelin taasina waxaa ka daran ilaaladii aqalka madaxweynaha markii ay shalay tagayeen waxa ay furihii aqalkaasi ay ku tureen horaanta hore ee guriga ra’isulwasaaraha” ayuu mar kale yiri Maxamed Dheere oo ay ka muuqatay caro xooggani .

Gudoomiyaha gobolka Shabeelaha dhexe Maxamed Cumar Xabeeb Maxamed Dheere ayaa sheegay in madaxweyne C/laahi Yuusuf uu haatan abuurayo qilaaf ka baahsan midka haatan uu doonayo inuu xaliyo .

Maxamed Dheere ayaa dhinaca kale sheegay in uusan wax dhibaato ah u arkaynin in dowlada ay ka guurto Jowhar isla markaana ay degto magaalada Baydhabo ee xarunta gobolka Bay.

Maxamed Cadde.
RSTV NEWSROOM