Ciidamada maxaakiimta islaamiga ah iyo kuwa ganacsade Abuukar Cumar Caddaan oo la wareegay gacan ku heynta goobihii ugu muhiimsanaa ee dagaaladu ay ka dhacayeen.

Dagaal culus oo laysku adeegsanayo hubka noocyadiisa kala duwan ayaa saakay mar kale ka qarxay deegaanadii maalmihii lasoo dhaafay ay ku dagaalamayeen midowga maxaakimta islaamiga gobolka Banaadir iyo isbahaysiga argagixiso la dirirka. Dagaalkan oo galay maalintii 4aad ayaa waxaa uu saakay mar kale ka bilowday deegaanada Geed Timirka iyo Sheekh Cali C/lle oo ay isku hor fadhiyeen labada dhinac, iyadoo daryanka madaafiicda laga maqlayo deegaanada dagaalada ay ka socdaan oo ku yaalla duleedka maaalada Muqdisho.

Warar laga helayo jiida hore ee dagaalka waxa ay sheegayaan ciidanka maxaakimta islaamiga gobolka Banaadir in ay la wareeeen wadada isku xirta dekada Ceel Macaan iyo magaalada Muqdisho, iyadoo ciidanka maxaakimtana ay kusii siqayaan deegaanadii fariisinka u ahaa maleeshiyooyinka isbahaysiga gaar ahaan kuwa Bashiir Raage. Warar goor dhaweyd nasoo gaaray ayaa sheegaya in maxaakiimta ay la wareegeen garoonkii dayaaradaha ee Cesilay iyo dekedii ceelcade waxaana haatan deegaanadii lagu dirirayey inta badan ay gacanta ugu jiraan ciidamada ganacsade Abuukar Cumar Caddaan. Ciidanka maxaakimta islaamiga gobolka Banaadir ayaa saakay u muuqda kuwo aad u caaboon oo dar dar xoogan la soo baxay, halka kuwa isbahaysigana ay ka muuqato niyad xumo iyo rajo beel.

Dagaalkii shalay oo ahaa mid aad u culus oo faraha looga gubtay ayaa iskiis u istaagay gabalka markuu dhacay, iyadoo labada dhinacna ay xalay isku ridayeen rasaas goos goos ah oo dhinac kasto ku muujinayo in uu heegan buuxo ku jiro. Dagaalka saakay oo ku bilowday si goos goos ah ayaa waxa uu iminka u muuqdaa mid sii xoogaysanaya, iyadoo jiida hore ee dagaalka laga maqlayo rasaasta oo si weyn isugu dhacaysa, waxaana labada dhinac ay isku adeegsanayaan gawaarida dagaalka oo ay saaran yihiin lidka diyaaradaha iyo madaafiicda. Ilaa iminka lama garanayo khasaaraha ka dhashay dagaalkii saakay ka dhex qarxay labada dhinac, balse waxaa isoo soo taraya khasaaraha guud ee ka dhashay guud ahaan dagaalka ka socda magaaalada Muqdisho maalintii 4aad galay. Tirada dhimashada waxa ay kor u dhaaftay 100 dhaawacana waxa uu ka gudbay 200 oo kale, iyadoo ay ku jiraan dadka wax ku noqday dagaalkaas dad rayid ah oo ay haleeshay rasaasta habawga ah oo ay is weydaarsanayaan labada dhinac ee dagaalamaya.

Maxamed Cadde.
RSTV NEWSROOM
MOGADISHU