Ciimaddaa maariiniska Maraykanka ayaa sheegay in ay baaritaano ku hayaan is rasaasayntii ka dhacday maalintii sabtida xeebaha Soomaaliya, taasoo dhex martay ciimada Maraykanka iyo rag looga shaki qabo in ay ahaayeen burcad badeed Soomaali ah.

Jenaraal Charlie Brown oo kamid ah taliyayaasha ciidamada Marayknka ayaa sheegay baaritaanada lagu hayo ragan looga shaki qabo burcad badeeda in uu socdo, isagoo tibaaxay qeyb kamid ah baaritaanada in diiradda lagu saarayo qaabka iyo goobta maxkamada lagu soo taagayo ragan.

Jenaraalka waxa uu intaa kudaray 5 kamid ah 12 qof ee gacantooda kujirta in iminka la daweynayo, isagoo carabaabay in ay kala wareegeen maleeshiyooyinkaas hubkii ay wateen oo isugu jiray baasukayaal iyo qoryo gacmeedyo.

Hay’ada caalamiga ah ee u dhuun daloosha falalka burcad badeeda ee marka lasoo gaabiyo loo yaqaano IMB ee fadhigoodu yahay magaalada London warbixintii todabaad laha ah oo ay kasoo saarto falalka burcadnimada badda ee ku beegnayd 7da ilaa 13ka bisha march waxa ay ku sheegtay ilaa 39 fal oo burcadnimo ah in ay ka dhaceen biyaha dalka Soomaaliya tan iyo bartimihii bishii march ee sanadkii laga soo gudbay.

Horaantii bishan aanu ku jirtno qoraal uu soo saaray xoghayaha guud ee QM Kofi Annan waxa uu ku booriyay howl gallada lagu la dagaalamayo burcad badeeda oo ay ciidamada maariiniska Maraykanka ka wadaan xeebaha Soomaaliya in ay laba jibaaraan si looga hortago burcad badeeda caqabada ku ah shixnadaha gar gaarka ee loogu tala galay dadka abaaruhu ay ku hayaan qeybo kamid ah dalka Soomaaliya iyo guud ahaan geeska afrika.

Maxamed Cadde.
RSTV NEWSROOM
MOGADISHU