Warar laga helay ilo muhiim ah oo ku dhaw dhaw xubnaha dowladda ayaa sheegaya maleeshiyooyin tiradoodu lagu qiyaasay 150 ruux oo ilaale u noqon doona masuuliyiinta ugu sarreysa dowladda in tababar loogu qaadi doono dalka dibadiisa maalmaha soo socda.

Wararka ayaa waxa ay intaa kudarayaan in 70 kamid ah maleeshiyooyinkaas ay ilaale gaar ah u noqon doonaan madaxweyne C/llaahi Yuusuf halka min 40 kalena ay ilaale u noqon doonaan ra'iisal wasaare Cali Max'ed Geeddi iyo gudoomiye Shariif Xasan Sheekh Aadan, waxaana maleeshiyooyinkaas oo loo qaadi doono magaalada Mombasa ee dalka Kenya qarashka ku bixi doona bixin doona dalalka deeqaha bixiya.

Hayeeshee waxaa soo baxaya muran iyo is qab qabsi ka dhashay maleeshiyooyinka ilaalada u noqonaya gudoomiyaha baarlamanka Shariif Xasan Sheekh Aadan oo nasiib u yeeshay in ay noqdaan kuwa ugu horreeya ee loo qaadayo tababarkaas, iyadoo beelaha Digil iyo Mirifle ay si weyn ugu muransan yihiin qaabka loo qeybsanayo maleeshiyooyinkaas fursadaha tababar loo ballan qaaday.

Maleeshiyooyinkan loo qaadayo tababarka ee ilaalada u noqon doona Shariif Xasan ayaa waxaa la sheegayaa qaar kamid ah masuuliyiinta beelaha Digil iyo Mirifle in ay saluugsan yahay qaabka loo qeybsaday maleeshiyooyinkaas oo ahaa mid qabiil, iyagoo ku doodaya in la sameeyay sad bursi iyo wax isdaba marsiis, waxa ayna ku warrameen in ay muhiim tahay fursadahaas in si siman loogu qeybiyo beelaha Digil iyo Mirifle oo aan hal beel loo badin, halka beelo kalena lagu qadiyo qeybsiga maleeshiyooyinkaas.

Masuuliyiinta beelaha Digil iyo Mirifle ayaa waxaa u socda kulamo gooni gooni ah oo ay ka yeelanayaan soo afjarida khilaafkan ka dhashay qeybsiga maleeshiyooyinkan loo qaadayo tababar lagu soo siinayo dalka dibadiisa, waxaana muuqata in beelaha qaarkood oo lagu qadiyay qeybisga maleeshiyooyinkaas in aysan la dhacsaneyn qaabka wax loo qeybsaday, taasoo keeni karta muran hor leh in uu soo kala dhex galo beelaha Digil iyo Mirifle oo dhowr jeer ugu dagaalamay gacan ku haynta magaalada Baydhabo.

Ma cadda ilaa iyo iminka maleeshiyooyinka ay dirsan doonaan madaxweyne C/llaahi Yuusuf iyo ra'iisal wasaare Geedi iyo sida ay noqonayaan, inkastoo la filayo in ayagana lagu dhameeyo qaab qabiil oo lamid ah tan ay wax ku qeyb sanayaan beelaha Digil iyo Mirifle.

Si kastaba ha ahaatee maleeshiyooyinka loo qaadayo magaalada Mombasa ayaa waxa ay noqonayaan raacii 2aad oo tababar loogu qaado dalka dibadiisa, iyadoo horay dalka Uganda loo qaaday maleeshiyooyin loo tababarayay in ay ka mid noqdaan ciidanka booliska Soomaaliyeed.

Maxamed Cadde.
RSTV NEWSROOM
MOGADISHU