Prof Cali Maxamed Geedi oo gelinkii danbe ee maanta gaaray magaalada Nairobi .

Wasiirka koowaad ee Xukuumadda KMG ah ee Soomaaliya Dr Cali Maxamed Geedi iyo Wafdi wasiiro ah oo la socday ayaa Galabta waxay soo Gaareen Magaalada Neyroobi ee xarunta dalka Kenya .

Xubnaha ra’isulwasaaraha la socday oo ay ka mid yihiin wasiirada qorsheynta iyo iskaashiga caalamiga ah C/risaq Cisman Xassan Jurile ,maaliyada Saalim Caliyow Ibrow,warfaafinta Maxamed Cabdi Xayir Maareeye iyo xubno kale ayaa ujeedada socdaalkooda waxay la xiriirtaa ka qeyb galka kulan ay isugu imanayaan madax ka kala socota urur goboleedka IGAD oo lagu wado in 20-ka bishan uu ka dhaco Nairobi.

Ra’isulwasaaraha ayaa ka hadlay socdaalkiisa intii aanu ka ambabixin magaalada Baydhabo oo uu kulan kula yeeshay golihiisa wasiirada isagoo sheegay in uu magaalada Nairobi kula kulmi doono diblomaasiyiin ka socota hay’adaha Qaramada midoobay oo ay ka wada hadli doonaan sidii gargaar loogu fidin lahaa dowlada iyo shacbiga Soomaaliyeed.

Kulankii golaha wasiirada ayaa maanta looga hadlay arimo ay ka mid yihin dhaqan gelinta baasaboor loo sameeyey Soomaaliya oo isla maanta golaha wasirada ay ansixiyeen,amniga qaranka ,canshuur ururinta iyo arimo kale waxaana lagu magacaabay guddi howshaasi sii wada.

Tegitaanka ra’isulwasaaraha iyo wafdigiisa ay maanta tageen magaalada Nairobi waa markii ugu horeysay tan iyo markii baarlamaanka uu isugu yimid magaalada baydhabo uuna uga bilowday kalfadhigii ugu horeeyey oo ay Soomaaliya ku yeesheen .

Maxamed Cadde.
RSTV NEWSROOM
Mogadishu