Xiisad dagaal ayaa maanta mar kale ka qaraxday degmada Buuloburde ee gobolka Hiiraan taasi oo u dhaxaysa gudoomiyaha gobolka Hiiraan Yuusuf Axmed Hagar Dabageed iyo gudoomiyaha degmada Buuloburde ee xoogga talada looga tuurey ee Cabdi Iidow Sabriye .

Saakay ayaa degmada Buulo Burde laga dareemay jawi colaadeed ka dib markii maleeshiyooyin ay kala taabacsan Dabageed iyo gudoomiyaha degmada Buuloburde Cabdi Iidow Sabriye ay rasaas xooggan is weydaarsadeen ayadoo is rasaaseyntaasina ay ku dhaawacmeen 5 qof oo 3 ka mid ah ay ahaayeen caruur iskuul waalidkood uu usoo dirsaday oo rasaasta wiiftadi ahi haleeshay.

Gudoomiyihii degmada Buulo Burrde ee maamulka Buuloburde xoogga looga qaaday Cabdi Iidow Sabriye ayaa is rasaaseyntaasi dhicitaankeeda xaqiijiyey isagoo sheegay in ayaga guluf lagu soo qaaday laakiin ay iska caabiyeen .

Cabdi Iidow waxa uu weli ku adkeysanayaa maamulida degmada inkastoo laga xayuubiyey waxaana haatan degmada Buuloburde ka soconaya dhaqdhaqaaq ciidan oo labada dhinac ay wadaan ayadoo dadka deegaankana ay cabsi ka qabaan dagaal hor leh oo dhaca.

Xiisada ka taagan degmada Buuloburde ayaa salka ku heysa muran siyaasadeen u dhaxeeye mas’uuliyiinta gobolka Hiiraan kaasi oo ku aadan maamul u samaynta degmadaasi.

Maxamed Cadde.
RSTV NEWSROOM

Mcadde@rstvonline.com