Ra'iisul Wasaaraha dowladda Fedaraalka kmg ah ee Soomaaliya Cali Max'ed Geedi iyo wafdi uu hogaaminayay ayaa waxa ay gaareen magaalada Nairobi ee xarunta dalka Kenya, iyadoo halkaasina ay kusoo dhaweeyeen xubnaha labada gole ee ku sugan magaaladaasi.

Geedi ayaa waxa uu ku biiray masuuliyiinta ugu sarraysa dowladda ee wadahadalada xasaasiga ah ku leh magaalada Nairobi iyadoo masuuliyiintaasina ay ka baaraaan dagayaan halka ugu haboon ee lagu qaban karo kulanka baarlamanka fedaraalka KMG ah ee Soomaaliya oo ay haatan ka harsantahay todobaad qura.

Kulamo albaabada u xiranaayeen ayaa waxa uu magaaladaasi ugu soconayay tan iyo gelinkii danbe ee shalay madaxweynaha dowladda fedaraalka kmg ah ee Soomaliya C/Laahi Yuusuf Axmed iyo afhayeenka baarlamanka Shariif Xasan Sheekh Aadan, iyadoo ilaa iyo welina kulankaasi warbixino aan laga siin warbaahinta.

Socdaalkan deg dega ah ee uu ra'iisalwasaaraha ku tagay magaalada Nairobi ayaa ku soo beegmay xili masuuliyiinta ugu sarraysa dowladda ay halkaasi ku sugan yihiin si ay isugu dayaan qabsoomida kulankii la qorshaynayay in uu dhex maro baarlamanka fedaraalka kmg ah ee Soomaaliya oo fadhi wadajir ah aan isugu iman tan iyo wixii ka danbeeyay 17-kii bishii March kalkaasoo baarlamanka ay iskula tageen gacmaha taasoo waxyaabihii kasoo baxayna uu noqday dawlad kala degtay Jowhar iyo Muqdisho.

Maxamed Cadde.
RSTV NEWSROOM