Shir Jaraa'id oo maanta uu ku qabtay wasiirka waxbarashada dowladda federaalka KMG ah ee Soomaaliya Cali Cabdullaahi Cosoble degmada Jowhar oo uu ku sugan yahay ayaa waxa uu ku sheegay shirkiisa jaraa'id arrimo quseeyo xildhibaan .Maxamed Xuseen Cadow.

Wasiirka ayaa shirkiisa jaraa'id ugu baaqay xildhibaan Cadow in uu si deg deg ah uga soo baxo gobolka Hiiraan haddii uusan kasoo bixinna uu la kulmi doono cawaaqib xun.

Mar wax laga weydiiyay wasiirka waxbarashada sababta keentay in isaga oo Jowhar ku sugan uu ugu baaqo Cadow in uu Hiiraan isaga soo boxo ayaa sheegay in hadalkaasi uu kasoo baxay afkiisa ka dib markii ay ogaadeen in .Cadow ay qalalaaso ka wadaan qeybo kamid ah gobolka Hiiraan.

"waxaan ugu baaqeynaa in uu kasoo baxo deegaanka uu ku sugan yahay uuna soo aado halkii uu mar horey ka tagay oo ah Muqdisho, waxaan ka codsanayaa dadka reer Hiiraan in aysan wax tallaabo ah ka qaadin .Cadow iyo maleeshiyadiisa inta uu waqtiga loo qabtay ka dhamaanayo, haddii uu isbaarada qaadi waayana ay mas'uuliyiinta reer Hiiraan tallaabo ka qaadi doonaan" ayuu yiri wasiirka waxbarashada Cali Cabdullaahi Cosoble.

Sidoo kale wasiirka waxbarashada waxa uu sheegay in kasoo kixitaanka Cadow uu kasoo baxayo gobolka Hiiraan ay dan u tahay dadka isla dhashay ee walaalaha ah ee kuwada dhaqan Gobolka Hiiraan

Hadalka wasiirka ka dib ma jirin wax war ah oo kasoo baxay Maxamed Xuseen Cadow oo k atirsan mudaneyaasha baarlamaanka federaalka KMG ah ee Soomaaliya oo uu kaga jawaabayo baaqani uu wasiirka waxbarashada soo saaray..

Inj.Maxamed Xuseen Cadow ayaa maalmihii lasoo dhaafay isaga iyo maleeshiyo uu wato waxa ay gaareen deegaanka Jawiil halkaasi oo ay ka sameysteen isbaarooyin ay ku sheegeen in ay lacago canshuuro ah kaga qaadayaan gawaarida wadadaasi isticmaasha.

Maxamed Cadde.