Mas'uuliyiin ka socota QM oo ka kooban 11 xubnood ayaa maanta soo gaaray magaalada Baydhabo ee xarunta gobolka Bay, iyagoo kasoo kicitimay magaalada Nairobi ee Xarunta dalka Kenya.

Wafdigan oo ay kamid yihiin Sarkaal QM u qaabilsan dhinaca nabadgelyada John Garden iyo Sarkaal kale ee u qaabilsan dhinaca dibu dhiska David Alen iyo khubarro kale oo dhinaca amaanka qaabilsan ayaa waxaa ku soo dhaweeyay garoonka diyaaradaha ee magaalada Baydhabo Xubno katirsan labada gole oo sharaxaad uga bixiyay xaalada magaalada Baydhabo iyo horumarka laga sameeyay dhinaca nabadgelyada tan iyo markii loo doortay in ay marti geliso kalfadhiga baarlamanka ee laqaban doono dabayaaqada bishan February.

Socdaalka wafdigan oo lasheegay in uu laxiriiro qiimeyn lagu sameeynayo amaanka magaalada Baydhabo iyo goobaha la dejinayo xildhibanada ayaa durbadiiba bilaabay in ay booqdaan xarumo dhowr ah oo loo qoondeeyay in ladejiyo Xaldhibaanada imaan doona magaalada iyo dugsiga 11ka janaayo ee la iclaamiyay kalfadhiga baarlamanka in lagu qaban doono, iyadoo indha indhayntaasna ay wehlinayeen xubno katirsan labada gole ee dowladda fedaraalka kmg ah ee Soomaaliya ayaa waxa ay booqdeen.

Wafdigan kasocda QM ayaa waxaa lafilayaa gellinka danbe ee maanta dib in ay ugu laabtaan magaalada Nairobi oo markii horaba ay kasoo duuleen.

Maxamed Cadde
RSTV NEWSROOM