Wafdi xildhibaano iyo wasiiro isugu jira oo ka soo jeeda beelaha Digil iyo Mirifle ayaa saakay gaaray magaalada Baydhabo ee xarunta gobolka Baay, iyagoo ka soo duulay magaalada Jowhar ee xarunta gobolka Sh/dhexe.

Wafdigaan xildhibaanada iyo wasiirada isugu jira oo ka kooban 13 xubnood oo ay ka mid ahaayeen wasiirka dastuurka iyo arimaha federaalka Cabdalle Deerow Isaaq, wasiirka dib u heshiisiinta iyo jaaliyadaha Sheekh Aadan Madeer, wasiirka Tamarta Nuuraane Bakar, Wasiir K/xigeenka dhaqan celinta iyo maleeshiyaadka, wasiir K/xigeenka owqaafta iyo diinta iyo mudanayaal kale ayaa si weyn loogu soo dhaweeyay garoonka diyaaradaha ee magaalada Baydhabo, iyadoo xubnihii soo dhaweeyay ay ka mid ahaayeen wasiirka cadaaladda Sheekh Aadan Madoobe iyo waliba Xildhibaano uu ka mid ahaa XIldhi. C/laahi Black.

Wafdigaan ayaa waxaa ku jira wasiiro iyo xildhibaano kale oo aan ka soo jeedin beelaha D&M, waxaana ay horudhac u yihiin mudanayaal iyo wasiiro halkaasi gaari doona maalmaha soo socda, iyadoo 26 ka bishaan lagu wado in kulanka BFS uu ka dhaco magaalada Baydhabo.

Xubnahan ayaa waxaa la qorsheynayay in ay ka dagaan garoonka diyaaradaha ee magaalada Waajid, iyagoo loo soo weeciyay dhinaca magaalada Baydhabo, waxaana sababta arinkaan lagu sheegay in mudanayaashaan ay wadatashiyo iyo kulamo la qaadan doonaan Gudoomiyaha Baarlamanka sida uu saxaafadda magaalada Baydhabo u sheegay Nidaamiyaha BFS.

Imaatinka xubnahaan ee magaalada Baydhabo ayaa ku soo beegmatay xilli shalay magaaladaasi uu soo gaaray Gudoomiyaha BFS iyo wadi uu hogaaminayo oo ka soo duulay magaalada Nairobi, iyadoo Maalmaha soo socda lagu wado in mudanayaal iyo wasiiro ka tirsan BFS ay gaaraan magaalada Baydhabo.

Maxamed Cadde.
RSTV NEWSROOM