Warar kasoo baxay magaalada Adis Ababa ee dalka Itoobiya ayaa sheegaya Wasiirada u qaabilsan arimaha qaxootiga dowladaha xubnaha ka ah ururka IGAD oo ay kujirto Soomaaliya in ay kulan kuyeelan doonaan magaalada Nairbi 20ka ilaa 21ka bishan aynu kujirno ee February, iyagoo falanqeyn doono dhibaatada haysata qaxootiga,dadka kusoo barakacay dagaalada iyo walib kuwa doonaya dib in ay ugu laabtaan dalalkooda.

Ka qeyb galayaasha shirkan oo ay soo qaban qaabiyeen IGAD iyo xafiiska isku xirka qaarada afrika ee hoos taga UNHCR fadhigiisuna uu yahay magaalada Adis Ababa ayaa kawada hadli doono dhibaatooyinka bini’aadanimo ee kajira Gobolka iyo dejinta qorshe wax looga qabanayo, isla markaana gar gaar loogu fidinayo dadka dhibaatada ay kasoo gaartay dagaalada kajira gobolka.

Ururka IGAD oo ay ku bahoobeen dalalka Soomaaliya, Jabuuti, Kenya, Itoobiya, Eratariya, Uganda iyo Suudaan waxaa horyaalla wax u qabashada dadka ku barakacay dagaalada kajira dalka Suudaan, Waqooyiga Uganda iyo dalka Soomaaliya oo tiradooda lagu qiyaasay 7 milyan oo qof oo ah tirada ugu badan ee qaxootiga qaxootiga qaarada afrika, marka la eego caalamkana kaga jirta 30%.

UNHCR ayaa sheegtay shirkan looga hadlayo arimaha qaxootiga fursad dahabi ah in uu yahay la tacaalida dadka ka barakacaya dagaalada kajira Gobolka.

Khubaro kasoo jeeda gobolka ayaa waxa ay maanta iyo beriyo yeelanayaan kulan hordhac ah oo ay ugu gogol xaarayaan kulanka dhex mari doona wasiirada dowladaha xubnaha ka ah urur goboleedka IGAD isugu imaanayaan.

Maxamed Cadde.
RSTV NEWSROOM