Afhayeenka baarlamaanka KMG ah ee Soomaaliya Shariif Xassan Sheekh Aadan ayaa maanta sidii la filayeyba ka degay magaalada Gaalkacyo ee xarunta gobolka Mudug halkaasi oo si weyn loogu soo dhaweeyey.

Afhayeenka barlamaanka iyo wadigii la socday oo maanta ka dhoofay magaalada Baydhabo ayaa waxaa magaalada Gaalkacyo kusoo dhaweeyey xubno xildhibaano iyo wasiiro isugu jira oo uu hogaaminayey ara'isulwasaare Cali Maxamed Geedi,mas'uuliyiin maamul goboleedka Puntland ka tirsan iyo kumanaan dadweyne ah oo isugu soo baxay soo dhaweynta gudoomiyaha kuwaasi oo caleemo qoyan ruxayey.

Afhayeenka barlamaanka iyo xubnihii la socday oo ay ka mid ah ahaayeen wasiiro ku hubeysan Muqdisho oo ay ugu horeeyen wasiirka howlaha guud iyo guryeynta Cisman Xassan Caato"Caato" iyo wasiiru dowladaha dekedaha iyo gaadiidka badda Maxamed Jaamac Furux ayaa markii ay soo gaareen gudaha magaalada Galkacyo waxaa loo sii gudbiyey hoteelka lagu magacaabo Tar City oo ku yaalla duleedka magaalada xarunta u ah gobolka Mudug ee Gaalkacyo.

Shariif Xassan iyo wafdigiisa ayaa hoteelkaasi waxa ay kulamo kula qaadan doonaan madaxweynaha iyo ra'isulwasaare KMG ah ee Soomaaliya C/laahi Yuusuf Axmed iyo Cali Maxamed Geeddi si madaxda sar sare ee dowlada ay hal mowqif oo mid ah u wada qaataan oo laga gudbo qilaafka iyo is heysadka siyaasadeed.

Seddaxdan mas'uul ee ugu sareysa dowlada ayaa la filayaa in marka ay soo dhameystaan kulamadooda ay si usoo dhaqaan ayagoo wada jira magaalada Baydhabo ee xarunta gobolka Bay si ay uga qeyb qaataan kalfadhiga barlamaanka ee magaalada Baydhabo ka furmaya 26-ka bishan aynu ku jirno.

Maxamed Cadde
RSTV NEWSROOM