Gudoomiyaha barlamaanka KMG ah ee Soomaaliya ayaa wada qorshe ballaaran o la isugu keenayo hogaamiyaasha hubeysan ee Muqdisho ku sugan ee kasoo horjeeda siyaasada madaxweynaha iyo ra'isulwasaaraha KMG ah ee Soomaaliya waxaana gudoomiyaha barlamaanka haatan uu ku howlan yahay sidii la isugu soo dhaweyn lahaa madaxweynaha,ra'isulwasaaraha iyo wasiirka howlaha guud iyo guryeynta Cisman Xassan cali Caato ayadoo haatan lagu soo waramayo in kulan irdaha loo laabay uu uga socda mas'uuliyiintan xarunta madaxweynaha uu ka degan yahay Gaalkacyo ee hotel Tar.

Shariif Xassan ayaa isuga cayaarada kaalinta dhexdhexaadiye nimada isagoo ku howlan sida wararku sheegayaan ka dhaadhicinta wasiirada hubeysan ee Muqdisho ku sugan taageerida heshiisyadii uu la gaaray madaxweynaha iyo ra'isulwasaaraha iyo waliba in ay si wada jir ah ay uga qeyb galaan kulanka Baydhabo looga balansanyahay 26-ka bishan.

Dhinaca kale munaasabad qado ah oo ayaa maanta madaxda dowlada federaalka KMG ah ee Soomaaliya waxaa loogu sameeyey tuulada Roox ee ku taal duleedka magaalada Gaalkacyo ee xarunta gobolka Mudug.

Xafladan ayaa waxay tahay mid qado ah waxaana loo sameeyey madaxweyne C/laahi Yuusuf, Gudoomiye Shariif Xasan, ra'isalwasaare Geedi,wasiirka hawlaha guud Cismaan Caato iyo xubnaha kale ee DFKMG ah ee Soomaaliya iyo xubno kale oo dowlad goboleedka Puntland ka socday.

Qadadan ay isla qaataan mas'uuliyiintan ayaa muujinaysa in uu jiro isu soo dhawaanshiyo u dhaxeeye madax sare ee xukuumada KMG ah ee Soomaaliya.

Maxamed Cadde.
RSTVONLINE