Wararka naga soo gaaraya magaalada Kismaayo ee xarunta gobolka jubbada hoose ayaa sheegaya qalalaase fiidnimadii xalay ahayd ka dhacday gudaha magaalada Kismaayo in uu ku geeriyooday mid ka mid ah Ilaalada gaarka ah ee wasiirka dib u dhiska iyo dib u dejinta ahna gudoomiyaha Isbahaysiga Dooxada Jubba Barre Aadan Shire (Barre Hiiraale).

Falkan oo kadhacay Xaafada Guulwade ee magaalada Kismaayo oo ay gaysteen Maliishiyooyin kaxaysanayay gaari yar ayaa ilaa iyo weli la garanayn sababta dhabta ah ee kadanbaysa, balse wararka qaar ayaa waxa ay sheegayaan falkan dilka ah in ay gaysteen Maliishiyooyin daacad u ah Col. Cabdi Cigaal oo xalay dib ugu soo laabtay magaalada Kismaayo.

Ninkan katirsanaa Ilaalada Wasiirka dibu dhiska iyo dibu dejinta oo la oran jiray C/laahi Barweyne ayaa lagu soo warramayaa xiliga laqaarijinayay ninkan in uunan wax shaqo ah kujirin, waxaana saakay lagu aasay Xabaale kuyaalla Koonfurta magaalada Kismaayo.

Dilkan ninkan katirsan Ilaalada Barre Hiiraale ayaa kusoo beegmaya xilli magaalada Kismaayo shalay dib loogu soo celiyo Maliishiyooyin ka amar qaata Col. Cabdu Cigaal oo dhawaanahan gaduud ugu maqnaa Jaziirada Kooyaame, kadib dagaalkii qaraaraa ee dhex maray Maliishiyooyinka Isbahaysiga Dooxada Jubba iyo Maliishiyooyin taabacsan Col. Cabdi Cigaal Jaamac oo isna mar ahaan jiray Taliyaha Maliidhiyooyinka Isbahaysiga Dooxada Jubba, balse xufguf ay dhex martay isaga iyo Barre Hiiraale.

Dib usoo celinta Maliishiyooyinkan ayaa timid kadib markii Gudoomiye kuxigeenka Isbahaysiga Dooxada Jubba ahna Xildhibaan katirsan Dowladda Fedaraalka kmg ah ee Soomaaliya Yuusuf Mire Seeraar oo maalmahanba ku howlanaa soo afjarida xiisadihii dhaliyay gacan kahadalkii dhex maray Maliishiyooyinka kala taageersan Barre Hiiraale iyo Col. Cabdi Cigaal.

Xildhibaan Seeraar oo kusugnaa magaalada Jowhar xiligi dagaalka culus ee kaqarxay magaalada Kismaayo ayaa kadhaadhiciyay Maliishiyooyinkan dib in ay ugu soo laabtaan magaalada Kismaayo.

Xildhibaan Seeraar oo hadal kooban u jeediyay maliishiyooyinkaas ayaa ku boorriyay in ay dhowraan nidaamka iyo kala danbaynta, isla markaana ay la shaqeeyaan ciidamada Isbahaysiga Dooxada Jubba, isagoo ugu baaqay in ay iska halmaamaan dagaalkii ka dhacay magaalada ee dhex maray maliishiyooyinkaas iyo maliishiyooyinka Isbahaysiga Dooxada Jubba.

Dhanka kale Maliishiyooyinka Isbahaysiga Dooxada Jubba ayaa maanta waxa ay magaalada Kismayo ka bilaaben roondooyin lagu sugayo ammaanka, isla markaana lagu baadi goobayo maleeshiyooyinkii dilka u geysatay mid kamid ah Ilaalada Barre Hiiraale.

Maxamed cadde
RSTV NEWSROOM