Xaalada magaalada Muqdisho ayaa Maanta xasiloon kadib markii dagaal socday ku dhawaad 15 daqiiqadood uu habeenimadii xalay kadhacay goobihii ay isku hor fadhiyeen ciidamada midowga maxaakimta islaamiga iyo isbahaysiga la dagaalanka waxa loogu yeeray argagixisada. Ee agagaarka dhismihii Kuliyadii Jaale Siyaad.

Wararka qasaaraha dagaalkii Xalay ayaa waxa uu sababay dhimashada hal qof iyo Dhaawaca Laba kale oo uu Madfac kula dhacay iyagoo marayey bartamaha suuqa bakaaraha ee Magaalada Muqdisho.

waxgarad isuga jira odayaal dhaqameed, siyaasiyiin iyo ganacsato ayaa waxa ay ka codsadeen midowga maxaakimta islaamiga in ay xabada jojiyaan, isla markaana ay u turaan shacabka Soomaaliyeed ee kudhaqan magaalada Muqdisho, taasoo masuuliyiinta midowga maxaakimta islaamiga ay ka aqbaleen codsigii masuuliyiintaas, waxa ayna ku dhawaaqeen dhankooda in ay qaateen talada waxgaradka, xabadana ay joojiyeen.

waxgaradkan ayaa caqabad kala kulmay dhanka isbahaysiga ladagaalanka argagixisada oo ka caga jiidaya xabada in ay joojiyaan, waxa ayna ugu baaqeen wasiirada hubaysan ee ku bahoobay isbahaysigaas in ay u naxaan shacabka ku dhaqan magaalada Muqdisho oo qaati ka taagan dhibaatada kala soo gudboonaatay dagaalada ay hurinayaan.

Maxamed Cadde.
RSTV NEWS, MUQDISHO