Qaar kamid ah hogaamiye kooxeedyada magaalada Muqdisho iyo qaar kamid ah ganacsatada gobolka Banaadir oo maanta kulan ku yeeshay xarunta hogaamiye kooxeedka Max’ed Qanyare Afrax ayaa maanta kaga dhawaaqay Isbahaysi la magac baxay Isbahaysiga la dagaalanka argagixisada iyo soo celinta amaanka.

Hagaamiye kooxeedyada kasoo qeyb galay kulankii maanta ka dhacay Dayniile waxaa kamid ahaa Max’ed Qanyare Afrax, Muuse Suudi Yalaxow, Cumar Maxamuud Max’ed (Cumar Finish), Bootaan Ciise Caalin, Bashiir Raage Shiiraar, C/rashiid Ilqeyte iyo rag kale oo sheegay in ay la dagaalami doonaan wax ay ugu yeereeen qolyaha hoyga siinaya argagixisada shisheeyaah ah, isla markaana ay ka nadiifin doonaan kuwa maal geliya argagixisada.

ragii maanta kaga dhawaaqay Isbahaysiga magaalada Muqdisho ayaa sheegay baaritaan dheer kadib in ay ogaadeen kuwa ka danbeeya dilalka loo gaysto Saraakiishii hore ee ciidamada dalka Soomaaliya oo ay ku tilmaameen kuwa xagjirta ah oo indhaha iyo wajiyada duubta.

Wasiirka Amniga Qaranka Max'ed Qanyare Afrax oo ka hadlay kulankii maanta lagaga dhawaaqay Isbahaysigaas ayaa kutilmaamay Maxaakiimta Islaamiga in ay yihiin argagixiso.

"argagixisada wey jirtaa, cid ismoogaysin karta majirta, maxkamado ayay furteen, afkey duubteen,daka ayay dilaan, xabsiyo ayay furteen, dadka ayay tarjuureeyaan, waa layaqaana, cid aan aqoon majirto" sidaasi waxaa yiri Max'ed Qanyare Afrax oo intaa ku daray fikirkan in iyaga leeyihiin, balse kan ay wadaan dadkaas uu kutilmaamay argagixisada waa mid laga keenay dalka dibadiisa sida bariiska iyo burka lakeeno.

Qanyare waxa uu sidoo kale tibaaxay in ay iscadeeyaan sidii Usaama Bin laadin, Eyman Al-dawaahiri iyo Abu Muscab Al-zarqaawi ay isku caddeeyeen.

Bashiir Raage oo isna ka hadlay kulankaas ayaa sheegay in ay la dagaalami doonaan wax uu ugu yeeray kuwa wata mabda'a Wahaabiyada, waxa uuna sheegay in ay culimo u yaqaanaan dariiqada Suufiyada oo aaminsan madhabka Shaaficiyada.

ku dhawaaqista Isbahaysigan ayaa ku soo beegmay xilli dagaal qaraar uu u dhexeeya Maliishiyooyin taabacsan hogaamiye kooxeedyada iyo Midowga maxaakimta islaamiga uu k kasocda agagaarka kuliyada Jaalle Siyaad ee wadada Warshadaha.

Maxamed Cadde.
RSTV NEWSROOM