Hay’adaha gar gaarka ayaa sheegay abaaraha ka jira gobollada ku yaalla xadka Soomaaliya iyo Kenya in ay sababeen barakac weyn oo soo food saaray dadka ku dhaqan deegaanaadaas oo u hayaamay koonfur bari ee dalka Itoobiya, halkaasoo lagu soo warramayo iyadana xaalku in uu marayo meel xun.

Hay’adaha gar gaarka ayaa tilmaamay cuno yari ba’an in ay soo wajahday caruurta, taasoo sababtay macluul iyo cudurro in ay u la’daan.

Warbixinada ay soo saareen hay’adaha gar gaarka waxa ay intaa ku darayaan dadkii ku dhaqnaa deegaanada miyiga in ay u soo hayaameen magaalooyinka kadib markii deegaanadooda ay ku dhufteen abaaro gallaaftay dadka iyo duunyada.

Xafiiska QM ee howlaha bini’aadanimada ee dalka Itoobiya ayaa sheegay, iyadoo mashruucyo dhowr ah laga hirgaliyay deegaanada ismaamulka Soomaalida, hadana baaxada dhibaatada in ay tahay weli mid maraysa meel aad khatar u ah.

Ururka MSF Belgium oo daraasad ka sameeyay killinka 5aad ee ismaamulka Soomaalida ayaa sheegtay cuni xumida baahsan ee ka jira gobolladaas in ay sara u qaaday tirada caruurta da’doodu ka hoosayso 5 sano jir ee ku dhimanaya gobolladaas.

Waxa ayna intaa kudartay hay’ada cudurka Xiiq dheerta in uu yahay kan ugu daran oo ay u dhimanayaan caruurtaas da’doodu ka hoosayso 5 sano jirka, waxa ayna MSF ku talisay in lala gaaro deegaanadaas biyo nadiif ah iyo cunno dhamaystiran si loo samata bixiyo caruurtaas macluusha baahsan ay soo food saartay.

Maxamed Cadde.
RSTV Mogadishu