Ra'iisul wasaaraha Xukuumada Federaalka Kmg ah ee Soomaaliya prof. Cali Maxamed Geeddi ayaa Maanta Barqadii ka soo dagey Garoonka Diyaaradaha ee Magaalada Jowhar.

Ra'iisul wasaare Geeddi ayaa wuxuu ka soo duulay Garoonka Magaalada Gaalkacyo ka dib markii ay u soo idlaatay Socdaalo shaqo oo qaatay muddo Todobaad ah kaasoo uu ku tagey Magaalada Gaalkacyo ee xarunta Gobolka Mudug.

Ra'iisul wasaaraha Soomaaliya ayaa socdaalkiisa waxaa ku wehlinayay xubno ka tirsan golayaasha Dowladda Federaalka Kmg ah ee Soomaaliya iyadoo garoonkuna ay ku soo dhaweeyeen qaar ka mid ah xubnaha goleyaasha Dowladda iyo Maamulka Gobolka Shabeelaha Dhexe.

Ra'iisul wasaare Geeddi ayaa intii uu joogay magaalada Gaalkacyo waxuu kulamo la soo qaatay Madaxweynaha Jamhuuriyada Federaalka Kmg.ah ee Soomaaliya Md: C/laahi Yuusuf Axmed iyo gudoomiyaha Baarlamanka Federaalka Kmg.ah ee Soomaaliya Shariif Xasan Shiikh Aadan kulamadaasi oo ahaa kuwa xiriir ah ayaa ugu dambeyntii waxay si wada jir ah u soo wada saareen qoraal todobo qodob ka kooban oo ay ugu weyn tahay in laga wada shaqeeyo Qabsoomida kulanka Dabayaaqadda Bishan uga Furmaya Magaalada Baydhabo Golaha Baarlamanka Soomaaliya.

Maxamed Cadde.