Gudoomiye kuxigeenka 2aad ee baarlamanka fedaraalka KMG ah ee Soomaaliya Cusmaan Cilmi Boqorre ayaa ku eedeeyay gudoomiyaha golaha baarlamanka Shariif Xasan Sheekh Aadan in uusan weli lasoo xiriirin isaga iyo gudoomiye kuxigeenka 1aad Prof. Max'ed Cumar Dalxa, isla markaana uusan kala tashanin kulanka baarlamanka ee ka dhacaya maalinta Axada ah magaalada Baydhabo.

Mudane Boqorre waxa uu beeniyay in iyaga dhinacooda ay diidan yihiin ka qeyb galka kalfadhiga baarlamanka fedaraalka kmg ah ee Soomaaliya ee kadhacaya magaalada Baydhabo, waxa uuna tilmaamay haddii uu lasoo xariiro gudoomiyaha baarlamanka, isla markaana uu kala tashado kalfadhiga baarlamanka in uu tagayo magaalada Baydhabo.

" Shariifka isagaa kaligii tashtay, aniga iyo Dalxa ma uusan nala tashanin, laakin haddii uu nala soo xiriiro maalmaha yar ee soo socda waan tagaynaa Baydhabo" ayuu yiri gudoomiye ku xigeenka 2-aad ee baarlamaanka Soomaaliya Cusmaan Cilmi Boqorre.

mar wax laga weydiiyay dagaaladii maalmahan ka dhacay magaalada Muqdisho ee u dhaxeeyay midowga maxaakimta islaamiga iyo isbahaysiga la dagaalanka argagixisada waxa uu sheegay in uu ka xunyahay mudo 15 sanadood kadib dhiig sukeeye in lagu daadiyo magaalada Muqdisho, waxa uuna dib u gocoday dadaalkii isbaaro qaadista oo ay ku guul daraysteen xubnaha labada gole garabka Muqdisho.

Cusmaan Boqorre oo sidoo kale la weydiiyay in magaalada Muqdiho joogaan argagixiso sida ay sheegeen isbahaysiga la dagaalanka argagixisada waxa uu carabaabay argagixiso in ay joogaan, balse ay yihiin kuwo aad u yar.

kuxigeenka 2aad eeGudoomiyaha baarlamanka fedaraalka KMG ah ee Soomaaliya Cusmaan Cilmi Boqorre ayaa ku gacan sayray dilkii wiilkiisa kal hore loogu gaystay magaalada Muqdisho in ay ka danbeeyeen argagixiso, balse waxa uu carabka ku dhajiyay shirqool siyaadadeed in lagu qaarijiyay wiilkiisa.

hadalka Boqorre ayaa kusoo beegmay xilli magaalada Jowhar ay ka socoto qaban qaabo loogu jiro safar madaxweynaha, ra'iisul wasaaraha iyo xubnaha labada gole ee dowladda ay ugu socdaalayaan magaalada Baydhabo, iyadoo la faliyo masuuliyiintaas in ay u ambabaxaan magaalada Baydhabo maalinta sabtida.

dhanka kale gudoomiye kuxigeenka 1aad ee baarlamanka Prof. Dalxa ayaa ilaa iyo weli aan la garanayn mowqifka uu ka qabo kalfadhiga baarlamanka ee ka dhacaya magaalada Baydhabo, isagoo aan ka hadlin go'aankii gudoomiyaha baarlamanka uu kaga dhawaaqay magaalada Nairobi ee ku saabsanaa kalfadhiga baarlamanka in uu ka dhaco magaalada Baydhabo.

Maxamed Cadde.
RSTV NEWSROOM