Wasiiraka cadaaladda dowladda FS Sheekh Aadan Madoobe iyo kolonyo gawaarida dagaalka ah oo la socda ayaa soo gaaray magaalada Baydhabo, iyagoo ka soo ambabaxay magaalada Xudur ee gobolka Bakool, iyadoo dhaawaca uu soo gaaray 3 ka mid ah maleeshiyooyinkii la socday kolonyadan ka dib markii ay isku dhaceen labo baabuur oo kuwa dagaalka ah.

Sheekh Aadan Madoobe oo ay wehliyaan ilaa 20 baabuur oo kuwa dagaalka ah oo ka kala yimid magaalooyinka Xudur iyo Waajid oo ay leeyihiin wasiirada beeraha iyo Cadaaladda dowladda FS ayaa soo gaaray magaalada Baydhabo, iyadoo halkaasi ay si weyn ugu soo dhaweeyeen xubno ka tirsan labada gole iyo shacbi aad u fara badan.

Wasiirka Dastuurka iyo arimaha Federaalka Cabdalle Deerow Isaaq, Wasiirka dib u heshiisiinta iyo jaaliyadaha Sheekh Aadan Madeer iyo xildhibaano kale ayaa ka mid ahaa dadkii ku soo daweeyay Sheekh Aadan Madoobe iyo Kolonyadiisa gawaarida dagaalka ah magaalada Baydhabo.

Waa markii ugu horeeysay ee gawaarida dagaalka Sheekh Aadan Madoobe ay soo gaarto magaalada Baydhabo, tan iyo waxii ka dambeeyay dagaaaladii magaaladaasi ku dhex maray isaga iyo Xildhibaan Xaabsade sanadkii la soo dhaafay.

Imaatinka maleeshiyooyinkaan ayaa ka dambeysay ka dib markii heshiis 8 qodob ka kooban ay Siyaasiyiinta iyo waxgaradka beelaha D&M ay ku gaareen magaalada Waajid ee gobolka Bakool.

Maxamed Cadde.
RSTV,Muqdisho.

Mcadde@rstvonline.com.