Ra’iisalwasaare ku xigeenka dowladda fedaraalka KMG ah ee Soomaaliya Maxamuud C/laahi Jaamac Sifir oo shalay gaaray magaalada Baydhabo ee xarunta gobolka Bay ayaa waxa uu kormeer qiimeyn ah kusoo kala bixiyay xurumaha loo qoondeeyay in la dejiyo mudanayaasha baarlamanka fedaraalka KMG ah ee Soomaaliya oo la filayo dhawaan in ay gaaraan magaaaladaasi si ay ugu qeyb galaan kalfadhiga baarlamanka ee ka dhacaya magaaladaas 26ka bishan aynu ku guda jirno.

Gudoomiyaha gudiga qabanqaabada Kalfadhiga barlamaanka Maxamed C/laahi Jaamac Sifir ayaa waxa uu booqday dhismayaal horay ay u lahaan jirtay dowladdii hore ee Maxamed Siyaad Barre oo ay ka mid ahayeen bakhaaradii lagu keydin jiray raashinka, xuruntii horumarinta beeraha iyo goobo kale, iyadoo dhamaan goobahaasna burbur lixaad leh uu ka soo gaaray boobkii ka dhacay dalka.

Xubnaha uu horkacayo Sifir ayaa sidoo kale kulamo la yeeshay siyaasiyiinta,waxgaradka iyo qeybaha kala duwan ee bulshada si ay wax badan uga ogaadaan diyaar garowga reer Baydhabo ay ugu jiraan marti gelinta kalfadhiga baarlamanka fedaraalka KMG ah ee Soomaaliya iyo talaabooyinka amaanka magaalada lagu sugayo oo ay qaadeen masuuliyiinta gacanta ku haysa magaalada Baydhabo.

Ra’iisalwasaare ku xigeenka dowladda fedaraalka KMG ah ee Soomaaliya Maxamuud C/laahi Jaamac Sifir iyo xubnaha uu horkacayo ayaa waxaa la faliyaa marka uu soo dhamaado socdaalkooda oo qaadan doona muddo 3 cisho ah in ay dib ugu laabtaan magaalada Nairobi si ay deeq bixiyayaasha ay ugu gudbiyaan warbixino la xiriira waxyaabaha loo baahan yahay ee ku aadan qabsoomida kalfadhiga baarlamanka fedaraalka KMG ah ee Soomaaliya oo markii ugu horreysay ay isugu imaanayaan xildhibaanada fedaraalka KMG ah ee Soomaaliya mudo ku dhow hal sano

Maxamed Cadde.
RSTVONLINE