Wararka ka imaanaya degmada Afgooye ee gobolka Shabeellaha Hoose ayaa waxa ay sheegayaan gaadiid la’aan baahsan in ay jirto degmadaasi ka gadaal markii kala dhaca gaadiidka uu saameyn ballaaran uu ku yeeshay gaadiidkii dadweynaha ee isaga kala gooshi jiray degmada Afgooye iyo magaalada Muqdisho.

Ilaa iyo shalay waxaa dhac loogu gaystay wadada isku xirta Afgooye iyo Muqdisho ilaa 5 Gaari, taasi oo sababtay in inta badan gaadiidkii ka howlgalayey wadadaasi ay shaqadooda joojiyaan.

Lama oga sababaha dhabta ah ee ugu wacan kala dhicida gaadiidka ee ka qarxay wadada isku xirta Afgooye iyo Muqdisho laakiin warar qaar oo soo baxaya ayaa sheegaya falalkan salka in ay ku hayaan kala dhac gaadiid oo horay ugu jiray wadadaaasi laakiin maalmihii lasoo dhaafay u muuqday mid xal laga gaaray.

Waxaa saakay lagu arkayay busteejada gaadiidka laga raaco ee magaalada Afgooye dad fara badan oo buuxa halkaasi kuwaasi oo sugaya gaadiid ay usoo raacaan Muqdisho, iyadoo halkaasina ay ka shaqaynayeen gaadiid tiro yar oo sara u qaaday qiimahii lagu raaci jiray gaadiidka ayagoo ka faa'ideysanaya fursadan gaadiid la'aanta ah.

Kala dhaca gaadiidka ma ahan fal ku cusub wadada isku xirta Afgooye iyo Muqdiso waana fal inta badan kusoo noqnoqday wadadaasi mana muuqata xal rasmi ah oo arintaasi laga gaaray.

Maxamed Carab.
RSTV NEWSROOM