Wasiirka arrimaha dibada ee Ethiopia Seyoum Mesfin ayaa ku tilmaamay xiriirka kala dhaxeeya dalkiisa wadanka Soomaaliya mid ku tallaabsanaya horumar la taaban karo.

Wasiirka arrimaha dibada ee Ethiopia ayaa hadalkaasi ka sheegay kulan dhex maray isaga iyo wasiirka arrimaha dibada ee Soomaaliya o socdaal shaqo ku jooga dalkaasi.

C/llaahi Sheekh Ismaaciil wasiirka arrimaha dibada ee Soomaaliya oo isagana kulankaasi ka hadlay ayaa ammaanay wax uu ku sheegay dadaalada Ethiopia ay ugu jirtay mudada 14ka sanadood ah sidii Soomaalida ay ku heli lahaayeen dawlad la aqoonsan yahay.

C/llaahi Sheekh Ismaaciil waxa uu intaa raaciyay in dawladda Ethiopia ay sidoo kale dadaal u gashay nabad iyo deganaan lagu soo dabaalo dalka Soomaaliya, isaga oo carabka ku dhuftay in dawladdiisa ay ka shaqeyn doonto horumarinta xiriirka ka dhaxeeya labada dal.

Kulankan dhex maray labada wasiir ayaa looga hadlay hanaanka loo meel marin karo heshiisyadii wasiiro arrimo dibadeedyada isbahaysiga Sanca ay ku kala saxiixdeen shirkii ugu danbeeyay oo ay ku yeesheen magaalada Sanca, gaar ahaan qodabadii quseeyay dalka soomaaliya sida uu sheegay danjiraha dawladda Ethiopia u qaabilsan arrimaha Soomaaliya C/Casiis Axmed.

Kulankan waxa uu kusoo beegmay xilli xildhibaanada baarlamanka ay ku eedeeyeen dawladda Ethiopia in ay xagal daacinayso dadaalada dib u heshiisinta dalka Soomaaliya, isla markaana ay doonayso in ay dalka u qeybiso gobollo hoos taga dalkeeda.