Wasiirada arrimaha dibada wadamada ku bahoobay Isbahaysiga Sanca ayaa maanta soo gaba gabeynaya shirkii shalay uga furmay magaalada Sanca, ayagoo ka soo saari doona warmurtiyeed ku baaqaya iskaashi buuxa oo dhex mara wadamada ku bahoobay isbahaysiga iyo waliba in cusbooneysiinta baaqii ahaa in dawladaha galbeedka afrika ay kusoo biiraan isbahaysiga.

Kulankii shalay dhex maray wasiirka arrimaha dibada ee Yemen Abuu Bakar Alqirbi, wasiirka arrimaha dibada ee Soomaaliya Prof. C/llaahi Sheekh Ismaaciil, wasiirka arrimaha dibada ee Suudaan Lam Akuul iyo wasiirka arrimaha dibada ee Etoobiya Siom Masvin oo looga hadlay arrimo dhawr ah oo ay ku jirto arrinta Soomaaliya ayaa laga soo saaray go’aano dhawr ah oo ay kamid ahayd xoghyen joogto ah oo loo sameeyay isbahaysiga, taasoo dawladda Yemen ay madax u noqonayso, fadhigeeduna uu noqon doono magaalada Sanca.

Wasiirka arrimaha dibada ee Yemen oo shir guddoominayay kulankaasi ayaa sheegay in ujeedada kulankan ay ahayd in lagu jeex jeexo arrimaha Soomaaliya iyo waliba horumarinta isbahaysiga.

“waxaanu la soconaa arrimaha Soomaliya oo bilihii laga soo gudbay kasoo reynayay, laakib arrintu waxa ay mar kale arrintu ka dartay tobaadyadii lasoo dhaafay, taasoo ay ugu wacan tahay dawladdu ooo awood heli waysay bixinta waxyaabaha ay u baahan yihiin maleeshiyooyinka sida raashin iyo mushahaaraadka iyo waliba arrimaha kale ee aasaasiga ah” ayuu yiri Abu Bakar Alqurbi.

Alqurbi ayaa ugu baaqay wadamada Carabta, kuwa islaamiga, beesha caalamka gaar ahaan deeq bixiyayaasha iyo waliba dawladaha xubnaha ka ah isbahaysiga Sanca in ay saacidaan dawladda fedaraalka kmg ah ee Soomaaliya si dawladda ay uga gudubto caqabadaha haysta, isagoo ku booriyay wadamada waa weyn in ay ka fogaadaan fara gelinta arrimaha gaarka ah ee Soomaaliya.

Wasiirka arrimaha dibada ee Soomaaliya prof. C/llaahi Sheekh Ismaaciil ayaa muujiyay sida uu ugu faraxsan yahay ka qeyb galka kulanka isbahaysiga, isagoo xaqiijiyay sida dawladdiisa ay u qiimeynayso dadaalada Yemen ay ugu jirto nabadeynta Soomaaliya.

“ kaalintii madaxweynaha Yaman waxa uu sababay in ay ku kulmaan Walaalaha Soomaaliyeed magaalada Baydhabo ,isla markaana baarlamaanka Soomaaliya uu hal meel kuwada shiro markii ugu horeysay ,sidaasi ma dhici lahayn haddii uusan jiri lahayn dadaalka madaxweynaha Yaman” ayuu yiri wasiirka arimaha dibada Soomaaliya C/laahi Sheekh Ismaaciil oo intaasi ku daray “ kulamada baarlamaanka Soomaaliya uu ku leeyahay magaalada Baydhabo waxaa kasoo baxay dhismaha gudiyo ka kooban 14 kuwaasi oo kaalin mug leh ka qaadanaya isku xirka baarlamaanka iyo xukuumada ,isla markaana wax ka qabanaya xalinta khilaafaadka yar yar ee dalka ka jira”.

Sidoo kale wasiirka arimaha dibada Soomaaliya waxa uu si weyn u amaanay dadaalada ay bixinayaan wadamada Sudan iyo Itoobiya ee ku aadan nabad ka islaaxinta Soomaaliya.

Maxamed Cadde.
Xafiiska Muqdisho.
RSTV NEWSROOM

© RSTV 2006. All Rights Reserved