RSTV NEWS...Jabhad ku kacsan maamulka Indhacade oo xalay weerar dad rayid ah ay ku waxyeeloobeen ku qaaday magaalada Marka.

Jabhad ku kacsan maamulka Indhacade oo xalay weerar dad rayid ah ay ku waxyeeloobeen ku qaaday magaalada Marka.

Ugu yaraan 5 qof ayaa ku dhaawacantay bambaanooyin fiidnimadii xalay lagu weeraray magaalada Marka ee gobolka Shabeellaha hoose, taasi oo masuuliyadeeda ay sheegteen jabhad isku magacaabtay badbaadada Digil oo ayada ku kacsan maamulka Shabeellaha hoose.

Kooxdaasi ayaa bambaano ku tuurtay meel lagu cunteeyo oo ku taalla bartamaha magaalada Marka, taasi oo sababtay in ay wax ku noqdaan dad rayid ah oo ka qaxweenayay maqaaxidaasi oo magaceeda lagu sheegay Baar C/qaadir.

Weerarkaasi waxaa sidoo kale uu sababay waxyeello soo gaartay gaari N3 oo halkaasi ku sugnaa, lama garanayo sababta kooxdaasi ay u beegsatay goobtaasi oo ahayd meel dadka rayidka ah ay isaga fiidsadaan.

Dadkii ku dhaawacmay weerarkaasi ayaa la dhigay cusbitalka guud ee magalada, halkaasi oo saakay ay soo buux dhaafiyeen ehaladii dadkaasi oo walaac aad u ballaaran ka muujiyay sababaha loo weeraray dadkan isaga sheekeysanayay maqaaxidaasi.

Kooxdan magaceeda ku sheegtaa jabhada bad baadada Digil ayaa sheegata in ay halgan kula jirto maamulka Sheekh Yuusuf Indhacade oo ay ku eedeysay in uu xoog ku haysto gobolka.

Maxamed Cadde.
Xafiiska Muqdisho.