Maalintii 6-aad ayaa waxaa si aan kala go' lahayn cusbitaalada waa weyn ee magaalada Muqdisho loogu wadaa daweynta dadka kusoo dhaawacmaya dagaalada ku dhex maraya ciidamada maxkamadaha islaamiga gobolka Banaadir iyo maleeshiyooyinka la dagaalanka argagixisada deegaano katirsan degmooyinka Yaaqshid iyo Kaaraan.

Cusbitaalka Madiina oo ka mid ah cusbitaalada sida weyn loogu daryeelo dadka kusoo waxyeeloobay dagaalada Muqdisho ayaa tan iyo saaka waxaa la gaarsiiyey dad kor u dhaafaya 15 ruux kuwaasi oo kusoo dhaawacmay dagaalka sida aan kala go'a lahayn maalintii lixaad uga soconaya xaafado ku yaalla dhinaca woqooyi ee Muqdisho.

Sheekh Doono Salaad Cilmi oo ah agaasimaha cusbitaalka Madiina ee magaalada Muqdisho ayaa sheegay in dhaawacyada maanta lasoo gaarsiiyey cusbitaalkaasi ay kor u dhaafayaan 15 ruux isla markaana ay qabaan dhaawacyo kala gedisan oo iska meel dhexaad ah,isagoo sheegay in haatan cusbitaalka uu la ciirciirayo dhaawacyada.

Cusbitaalka Madiina oo ay yaalaan in ka badan 100 ruux oo dhaawacyo kala duwan qaba ayaa dhaawacyada yaala waxaa ka mid ah 15 caruur oo da'doodu ay u dhaxeyso 6 bilood illaa 6 sano jir .

Mar maanta aan booqanay cusbitaalkaasi ayaa waxaan kula soo kulannay dad aad u faro badan oo buux dhaafiyey cusbitaalka kuwaasi oo u yimid booqashada eheladooda ku waxyeeloobay dagaalada Muqdisho,waxaana dadkan qaar ka mid ah oo aan la kulannay ay sheegeen in ay ugu baaqayaan dhinacyada is haya in dagaalka ay joojiyaan isla markaana khilaafoodka ay wada hadal ku dhamaystaan .

Si kastaba ha ahaatee waxaa marba marka kasii danbeyso sii kordhaya dadka ay waxyeeladu kasoo gaareyso dagaalka xaafada Siisii ka soconayo maadaama aysan muuqan wax ifafaalo ah oo muujinayo in dagaalka uu joogsanayo.

Maxamed Cadde.
Xafiiska Muqdisho.

© RSTV 2006. All Rights Reserved