Jenaraal Jaamac Maxamed Qaalib oo ka tirsan saraakiishii hore ee ciidanka booliska Soomaaliyeed ayaa muujiyay sida uu uga soo horjeedo ciidamo shisheeye ah in la keeno dalka Soomaaliya, isaga oo xusay in aysan jirin baahi iminka loo qabo in ciidamo shisheeye la keeno dalka Soomaaliya.

Jenaraal Qaalib oo ah siyaasi rugcadaa ah ayaa tibaaxay in ciidamo shisheeye ah aysan dawo u ahayn xaalada murugsan ee Soomaaliya, isaga oo carabka ku dhuftay in madaxweynaha uusan ku kalsooneyn umadda Sooamaliyeed, balse uu ku kalsoon yahay ciidamo Ethiopian ah.

Jenaraal Jaamac ayaa uga digay golaha baarlamanka ansixinta keenista ciidamo shisheeye ah, taasi oo uu tilmaamay in cawaaqib xumo ku reebi doonto dawladda Soomaaliya.

Mar wax laga weydiiyay jenaraalka sida uu u arko shirka ka dhacaya magaalada New York ee uu abaabulayo mareykanka ayaa sheegay in shirkaasi uu yahay mid lagu maleegayo shirqool ka dhan ah umadda Soomaaliyeed, maadaama wadamada laga casuumay shirkaasi in aysan ku jirin hal wadan oo islaam ah.

Janaraalka ayaa xaqiijiyay in shirkaasi uu ka danbeeyay guul darradii lagu dhigay qab qablayaashii uu taageeri jiray Mareykanka oo laga saaray magaalada Muqdisho.

Maxamed Cadde.

Xafiiska Muqdisho

© RSTV 2006. All Rights Reserved