Wasiiirka dib u dhiska iyo dib u dejinta dawladda fedaraalka kmg ah ee Soomaaliya Barre Aadan Shire ayaa maanta ka shanqariyay in madaxweyne C/llaahi Yuusuf uu ogalaaday maamul goboleed la magac baxay Jubba Land in loo sameeyo gobollada jubbooyinka, kadib kulankii ay ku yeeshen magaalada Nairobi ee dalka Kenya.

Barre Hiiraale oo maanta shir jaraa’id ku qabtay xaruntiisa Baranwaa ee magaalada Kismaayo ayaa sheegay in isaga iyo madaxweynaha ay sidoo kale kala hadleen dhamaystirka dib u heshiisiinta dawladda iyo waliba sidii dawladda loogu fidin lahaa gobollada dalka.

Guddoomiyaha isbahaysiga dooxada jubba ayaa kaga hadlay shirkiisa jaraa’id kulamadii uu la qaatay wakiilada hay’adaha gar gaarka oo ay isla gorfeeyeen sidii hay’adahaasi dib ugu soo laaban lahaayeen magaalada Kismaayo, waxa uuna xusay in dhinac kasto uu soo gudbiyay waxyaabaha uu ka tabanayo dhanka kale waa isbahasyiga iyo hay’adaha QM.

Barre Hiiraale waxa uu sidoo kale sheegay in uu kulan la qaatay jaaliyada Soomaaliyeed ee ku dhaqan magaalada Nairobi iyo waliba safiiro shisheeye ah oo ay ku jiraan safiirka Kenya u qaabilsan Soomaaliya Max’ed Cabdi Afey iyo safiirka dalka Talyaaniga Mario Rafa’elli, waxa ayna ka wada hadleen sidii loo dar dar gelin lahaa hawlaha dawladda iyo waliba sidii beesha caalamka ay uga taageeri lahayd dawladda fedaraalka in ay maamulkeeda ay ku fidiso guud ahaan gobollada dalka Soomaaliya.

Ugu danbeyntii wasiirka ayaa ku guubaabiyay reer Kismaayo in ay ka shaqeeyaan nabadda, isla markaana ay dhawraan kala danbeynta si magaaladooda ay u noqoto meel ay kusoo dhiiradaan hay’ada gar gaarka ee QM.

Maaxmed Cadde.
Xafiiska Muqdisho.
RSTV NEWSROOM

© RSTV 2006. All Rights Reserved