Golaha Ammaanka ee QM ayaa si kulu u canbaareeyay dagaalada ka soo cusboonaaday magaalada Muqdisho, waxa uuna dalbaday in si shuruud la’aan ah lagu joojiyo dagaaladaasi.

Danjiraha dalka Kongo-da Dimoqaraadiga Pascal Gayama oo iminka dalkiisa uu hayo madaxtinimada wareega ah ee golaha ammaanka ayaa dhaleeceeyay dagaalada soo noq noqonaya ee ka dhacaya magaalada Muqdisho, ayada oo walaac ka muujisay dadka rayidka ah ee waxyeeladu kasoo gaarayso dagaalada ka qarxay Muqdisho.

Goluhu waxa uu ku baaqay in si deg deg ah oo shuruud la’aan ah dagaalka lagu joojiyo , waxa uuna ku booriyay dhinacyada diriraya in ay xalilaan khilaafka u dhaxeeya.

Golaha ammaanka waxa carabka ku dhajiyay in si deg deg ah heshiis looga gaaro qorshaha ammaanka qaranka iyo xasilinta dalka Soomaaliya, si loo soo afmeero qalalahaasa ka jira magaalada Muqdisho.

Xubnaha golaha ammaanka ee QM ayaa ku booriyay dhinacyada isku haya magaalada Muqdisho in ay qadirayaan xeerarka caalamiga ah si gar gaarka bini aadanimo loo gaarsiiyo dadka dhibaateysan, isla markaana waxyeelada looga ilaaliyo shaqaalaha gar gaarka.

Golaha ammaanka ee QM ayaa sheegay in ay la soconayaan xaalada magaalada Muqdisho, ayada oo goluhu uu xusuusiyay wadamada 191ka ee xubnaha ka ah QM in ay ilaaliyaan xayiraada hubka ee saaran dalka Soomaaliya.

© RSTV 2006. All Rights Reserved