Dagaal culus oo laysku adeegsaday hubka noocyadiisa kala duwan ayaa maanta ka dhacay agagaarka aqalka madaxweyne Yuusuf uu ka degan yahay magaalada Baydhabo, kaasi oo dhex maray maleeshiyooyinka daacada u ah madaxweynaha iyo kuwa RRA-da.

Malaaq Seymow Cabdi Garuun oo ka tirsan malaaqyada caanka ah ee laga yaqaano magaalada Baydhabo ayaa ku geeriyooday , xildhibaan Xuseen Afaraalena waa uu ku dhaawacmay dagaalkii maanta ka qarxay magaalada Baydhabo abaarihii 12:00 duhurnimo, waxaana la sheegay in malaaqa uu hogaaminayay maleeshiyooyinka dagaalka la galay kuwa madaxweyne Yuusuf, halka xildhibaankana uu goobta marayay xiliga dagaalka uu qarxayay.

Ka sakow geerida Malaaqa waxaa sidoo kale ku geeriyooday 10 qof oo kale oo ka tirsanaa dhinacyadii dirirayay 15 kalena waa ay ku dhaawacmeen, ayada oo dagaalkaasi uu saameyn ku yeeshay dhaq dhaqaaqyadii ganacsi ee magaalada iyo guud ahaan isu socodka magaalada.

Waxaa iminka socda waan waan ay wadaan qaar ka mid masuuliyiinta dawladda iyo kuwa ka soo jeeda beelaha Digil iyo Mirifle oo dadaal weyn ugu jira soo afjarida xiisadaasi colaadeed ee ka taagan magaalada Baydhabo.

Dagaalkii maanta ka dhacay magaalada Baydhabo ayaa ku soo beegmay xili masuuliyiinta ugu sarreysa dawladda ay ku sugan yihiin magaaladaasi, taasi oo abuuri karta su’aalo dhawr ah oo ku saabsan sababaha keenay dagaalkaasi.

Maxamed Cadde.
Xafiiska Muqdisho.

© RSTV 2006. All Rights Reserved