Madaxweynayaasha wadamada Pakistan iyo Yaman ayaa maanta kulan dheer oo ay u yeesheen magaalada Islam abad ee xarunta wadanka Pakistan waxa ay ku jeexjeexeen arimo ay ka mid ahaayeen arimaha Soomaaliya.

Madaxweynaha wadanka Yaman Cali Cabdala Saalax oo ku jira booqasho uu ku marayo wadamo dhowr ah oo ku yaalla koonfur bari Eeshiya ayaa maanta waxa uu socdaal ku tagay wadanka Pakistan isagoo kulamo la qaatay dhigiisa wadankaasi ee Barvez Musharaf.

Labada madaxweyne ayaa si fiican isula meel dhigay xaalada wadanka Soomaaliya iyo sida ay isaga kaashan karaan gacan qabashada dowlada kmg ah ee Soomaaliya oo ayadu haatan ku howlan isku ballaarinta gudaha wadankeeda.

Madaxweynaha martida loo yahay ee wadanka Pakistan ayaa sheegay in wadanka Pakistan uusan ka daalin u gurmashada walaalihiisa Soomaalida isagoo tibaaxay in Pakistan ay waligeedba taageeri jirtay Soomaaliya haatanna ay sii wadi doonto taageeradaasi waxaana uu beesha caalamka ugu baaqay in ay ku dadaalaan taakuleynta dowlada kmg ah iyo shacabka Soomaaliyeed.

Madaxweynaha Yaman Cali Cabdala saalax ayaa isna ka codsaday beesha caalamka in ay sii laba jibaarto taageerada ay haatan u fidinayso dowlada kmg ah si ay ugu guuleysato wax u qabashada shacabkeeda.

Maxamed Cadde.
Xafiiska RSTV Muqdisho.
 

© RSTV 2006. All Rights Reserved