RSTV NEWS.Dowlada federaalka oo ka hadashay afduub maalintii afaraad magaalada Muqdisho loogu heysto wiil uu dhalay dallada culimada muslimiinta wadanka Soomaaliya.

Dowlada federaalka oo ka hadashay afduub maalintii afaraad magaalada Muqdisho loogu heysto wiil uu dhalay dallada culimada muslimiinta wadanka Soomaaliya.

Wasiirka dib u heshiisiinta dawladda fedaraalka kmg ah ee Soomaaliya mudane Sheekh Aadan Maxamed Madeer ayaa maanta markii ugu horreysay ka hadlay afduubka wiil yar oo uu dhalay guddoomiyaha Dallada Culamada Soomaaliyeed Sheekh Maxamuud C/baari maalintii 4aad afduub loogu haysto gudaha magaalada Muqdisho.

Wasiirka oo ay isku heyb yihiin sheekh Maxamuud oo ah aabaha wiilka yar ee afduubka lagu haysto ayaa codsaday si shuruud la’aan ah in lagu sii daayo wiilkaasi yar oo laga magacaabo C/raxmaan oo maalintii arbacada ahayd laga afduubtay dugsigii uu dhiganayay oo ku yaalla degmada Heliwaa ee magaalada Muqdisho.

Hadalka wasiirka waxa uu soo baxay kagadaal markii kooxda afduubka ku haysata oo qadka taleefanka kula soo xiriiray reerka wiilkaasi ay dalbadeen lacago madax furasho ah oo gaaraysa $12,000 oo doolarka Mareykanka ah, taaasoo uu ku gacan seyray Sheekh Maxamuud C/baari oo sheegay taa badalkeeda in uu ka samrayo wiilkiisa uu sida weyn u jecel yahay.

Ururada u dooda xuquuqda aadmiga ,kuwa u dhaqdhaqaaqa arimaha bulshada, ganacsatada gobolka Banaadir ,dalladaha waxbarashada, ururada ardayda iyo inta samaha jecel ayaa canbaareysay afduubka loo gaystay wiilka yar ee ardayga ah, ayadoo maantana albaabada loo laabay dugsiga Fatxu-Raxmaan oo ah dugsiga uu wax ka dhigan jiray ardayga.

Maxamed Cadde.
Xafiiska Muqdisho.
RSTV NEWSROOM