Guddigii madaxweyne C/llaahi Yuusuf Axmed u magacaabay xal ka gaarista xiisadii ka oognayd degmada Waajid ee ka dhalatay dil dhawaan halkaasi loogu gaystay mid ka mid ah dadka ku dhaqan oo ay ku kaceen maleeshiyooyinka daacada u ah madaxweynaha ee kasoo guuray xerada Kongo ayaa waxa ay ku guulaysteen in ay soo afjareen xiisaddaas.

Guddigan oo isugu jiray wasiiro iyo xildhibaano ayaa waxa ay ku qanciyeen odayaasha dhaqanka beesha uu kasoo jeedo ninka la dilay in ay qaateen magdhaw lacageed, ayadoo odayaasha dhaqanka oo markii hore dalbanayay in loo soo gacan geliyo raggii ka gaystay fal danbiyaadkaas ay aqbaleen xalkaas.

Waxaa sidoo kale kulankii dhex maray guddiga dhex dhexaadinta iyo odayaasha dhaqanka ay ku heshiiyeen ciidankaas in ay sii joogaan xeryaha looga sameeyay degmada iyo in ay u ogalaadaan ciidanka in ay la wadaagaan ceel biyoodyada deegaanka oo aanan laga takoorin.

Guddiga ka socda dowladda iyo odayaasha dhaqanka ayaa waxaa la filayaa in ay qaban qaabiyaan kulan si fool ka fool ah laysugu keenayo saraakiisha maleeshiyooyinka dowladda iyo odayaasha deegaanka si looga gudbbo caqabadaha taagan.

Ma cadda diyada lasiinayo reerka ninka laga dialy, laakin warar laga helayo degmada Waajid waxa ay sheegayaan reerka ninkaas in ay dalbadeen lacag kor u dhaafaysa 300 milyan oo shilin Soomaali ah.

Si kastaba ha ahaatee xal ka gaarista falkii ka dhacay degmada Waajid ayaa soo afjaraya xiisadihii ka taagnaa degmadaas oo ku xanbaaray madaxweyne C/llaahi Yuusuf Axmed in uu soo dhex galo si uu gacan uga gaysto soo afjarida xiisadahaas.

Maxamed Cadde.
RSTV NEWSROOM
MOGADISHU

© RSTV 2006. All Rights Reserved