Dadka ku dhaqan xaafada Faanoole ayaa ku eedeeyay maleeshiyaadka isbahaysiga la dagaalanka argagixisada in ay xaafadooda ka Gaysteen falal isugu jira dil, dhac, argagixin iyo falal kale oo xadgudub ku ah xuquuqda aadanaha.

Maleeshiyaadkaasi oo shalay qabsaday xaafadaasi ayaa shalay ku dilay halkaasi nin oday ah oo caanka ahaa xaafadaasi, oo xiliga la dilayay ku sugnaa dhismo uu deganaa oo ka mid ahaa dhismayaal ay lahaan jireen maariiniska Soomaaliyeed oo garabka ku haya xaruntii hore ee dugsiga hoose dhexe ee Godey.

Xaaji Cumar oo kamid ah dadka ku dhaqan xaafada ayaa sheegay in maleeshiyaadka ay ka qaateen guriga ninkaasi bistoolad, waxa uuna tilmaamay in maleeshiyaadka isbahaysiga ay jabsadeen xarumaha ganacsi iyo guryaha laga barakacay oo ay la haayeen dadka deegaanka.

Wasiirka ganacsiga oo xubin ka ah isbahaysiga argagixiso la dirirka ayna ka amar qaataana inta badan maleeshiyaadkii qabsaday deegaankaasi ayaa ku amray gellinkii danbe ee shalay in maleeshiyaadka isbahaysiga ay kasoo baxaan deegaanka, kadib markii dadka deegaanka ay bilaabeen in ay is abaabulaan, isla markaana ay u yeertaan beeshooda si ay isaga dhiciyaan maleeshiyaadkan yeyda ah ee xaalufinaya deegaanka.

Warar ku dhaw isbahaysiga ayaa sheegaya in isbahaysiga uu ergo u diray beesha uu ka dhashay odayga la dilay, si ay uga la xaalaan dilkii foosha xumaa ee lagu la kacay odaygaasi oo ahaa nabadoon si weyn looga yaqaano deegaanka.

Xaalada deegaanka ayaa aad u kacsan, ayadoo inta badan dadka ku dhaqan xaafada Faanoole ay aad u hadal hayaan sababaha loo dilay odaygaasi iyo ujeedada ka danbeysa dhaca iyo boobka baahsan ee loo gaystay deegaankooda, waxa ayna kuu sheegayaan marka aad la hadasho in dilkaasi uu ahaa mid qorsheysan oo ay wax ka ogaayeen xubnaha isbahaysiga.

Maxamed Cadde.
Xafiiska Muqdisho.
RSTV NEWSROOM

© RSTV 2006. All Rights Reserved