Hogaamiyaha Shiinaha ayaa booqasho ku jooga dalka Mareykanka

Hogaamiyaha Shiinaha Hu Jintao ayaa booqasho ku yimid Mareykanka, booqashadan oo qaadan doonta muddo 4 maalmood ah ayaa ay kaga wadahadli doonaan madaxweynaha mareykanka arrimo ay ka mid yihiin habka ganacsiga Adduunka.

Hu jintao socdaalkiisa waxaa uu ka billabey magaalada Seattle ee gobolka Washington oo ku yaalla galbeedka mareykanka halaasi oo xarun u ah Shirakadda Microsoft iyo shirkadda kale Boeing ee diyaaradaha sameysa waxaana uu kulamo ku saabsan ganacsiga  la yeelanayaa madaxda shirkadahaas.

Markaa ka dib hogaamiyaha shiinuhu waxaa uu u gudbi doonaa Magaalada  Washington DC waxaana uu la kulmi doonaa madaxweynaha Mareykanka George Bush. Labada masuul waxaa diiradda saarayaan sii xoojinta xiriirka u dhexeeya labada dal iyo ganacsiga waxaa kale oo ay isla soo qaadi doonaan arrimaha Adduunka ka taagan sida W/Kuuriya iyo Iiraan oo labaduba arrintooda Nuclear-ka ay muran dhalisey.

Hogaamiyaha shiinuhu waxaa kale oo uu hadal ka jeedin doonaa Jaamacadda lagu magacaabo Yale isagoo ka warbixin doonaa waddankiisa iyo arrimaha aduunka waxaa halkaas laga yaabaa in ay ardaydu su'aalo ku weydiiyaan .

Dalweynaha Shiinaha ayaa hadda u muuqda inuu meel sare ka marayo hawlaha ganacsiga Adduunka taasi  oo keentey in inuu si muuqata ula tartamo  dalal badan oo horumarey.

Abdifatah  M. Abdinur
RSTV NEWSROOM
MINNESOTA

© RSTV 2006. All Rights Reserved