RSTV NEWS.Madaxweynaha Soomaaliya oo Baydhabo dib ugu soo laabtay .

Madaxweynaha Soomaaliya oo Baydhabo dib ugu soo laabtay .

Wararka ka imaanaya magaalada Baydhabo ee xarunta gobolka Baay ayaa sheegaya in magaaladaasi maanta ay dib ugu soo laabteen wafdi ballaaran uu horkacayo madaxweynaha dawlada KMG ah ee Soomaaliya C/laahi Yuusuf Axmed kuwaasi oo kasoo duulay magaalada Nairobi ee xarunta dalka Kenya.

Xubnaha labada gole ee ku sugan magaalada Nairobi,mas'uuliyiinta gobolka iyo dadweyne aad u fara badan ayaa madaxweynaha iyo wafdigiisa kusoo dhaweeyey magaalada Baydhabo ee xarunta gobolka Baay.

Madaxweynaha iyo wafdigii la socday ayaa ka cudur daartay in wax war ah ay siiyaan saxaafada laakiin waxa ay sheegeen in marka ay nastaan ay dhiibi doonaan faahfaahin ku saabsan socdaalkii ay ku tageen magaalada Nairobi ee xarunta dalka Kenya.

Madaxweyne C/laahi Yuusuf Axmed ayaa magaalada Nairobi waxa uu maalintii shalay iyo tan iyo xalay kulamo kula lahaa gudoomiyaha gobolka Shabeelaha dhexe Maxamed Cumar Xabeeb Maxamed Dheere oo halkaa shalay gaaray ayadoo labada mas'uul ay soo gabagabeeyey khilaafki ka dhex jiray.

Warar aan ka helayno magaalada Baydhabo ayaa sheegaya in laga yaabo madaxweynaha Soomaaliya inuu gaari magaalada Jowhar xiliyada soo socda laakiin ma cadda waqtiga rasmiga ah ee madaxweynaha uu magaaladaasi tagayo.

Maxamed Cadde.
RSTV NEWSROOM
MOGADISHU