RSTV NEWS.Golaha Baarlamanka oo maanta dhameystiray dhagaysiga warbixinada ay soo diyaariyeen gudiyada Baarlamaanka.

Golaha Baarlamanka oo maanta dhameystiray dhagaysiga warbixinada ay soo diyaariyeen gudiyada Baarlamaanka.

Golaha baarlamanka ayaa maanta kulan ku yeeshay xarunta ADC ee magaalada Baydhabo, maalin uun kadib markii maleeshiyooyin hubeysan ay is hortaageen kulankii golaha wasiirada ee dowladda fedaraalka kmg ah ee Soomaaliya. Kulankii maanta oo lagu dhameystiray warbixino laga dhagaysanayay guddiyadii haray ee baarlamanka ayaa waxa ay guddiyadaasi soo bandhigeen qaabka ay ku shaqeynayaan, ayadoo xildhibaanada si weyn maanta ay uga doodeen howlaha gudiyadaas.

Kulankii maanta oo aan lagu casuumin saxaafada waxa uu gabagabadii kulankaas uga hadlay gudoomiye ku xigeenka 1aad ee baarlamanka Prof. Max'ed Cumar Dalxa. waxaa maanta warbixino laga dhagaystay guddiyada kala ah:

1) Gudiga hub ka dhigista..
2) Guddiga dib u heshiisiinta
3) Guddiga Cilmiga iyo Tiknoolajiyada.
4) Guddiga arrimaha dibada iyo xiriirka caalamiga.
5) Guddiga maaliyada iyo ilaalinta hantida qaranka.
6) Guddiga hubinta anshaxa.

Markaa kadib waxaa laysla gartay guddi farsamo oo isku soo duba rida howlaha guddigaa iyo qaabka ay u wada shaqeyn karaan guddiyada wasiirada. Gudoomiye ku xigeenka golaha baarlamanka Prof. Max'ed Cumar Dalxa ayaa waxa uu intaa ku daray in guddiga farsamo ee loo saaray isku duba ridida howlaha gudiyada baarlamanka oo ka kooban 9 xubnood ay muddo laba maalmood gudahood ah ay guddoonka baarlamanka u soo gudbi doonaan howsha loo xil saaray. Kulankii maanta ayaa ku soo beegmay xilli maanta magaalada Baydhabo iyo nawaaxigeeda laga qaaday isbaarooyin ay dhigteen maleeshiyooyinkii lagu xareeyay xerada Daynuunaay oo ku soo yaacay magaalada, kadib markii sida la sheegay ay soo food saartay daryeel xumo.

Maxamed Cadde.
RSTV NEWSROOM
MOGADISHU