Maleeshiyaadka isbahaysiga la baxay la dagaalanka argagixisada iyo soo celinta nabada ayaa xoog ku qabsaday xaruntii hore ee dugsiga hoose Dhexe ee Godey ee ku yaalla degmada kaaraan ee magaalada Muqdisho ka dib markii aroortii hore ee saaka ay dagaal la galeen ciidan dhawaan halkaasi fariisin ka dhigtay kuwaasi oo lagu eedeeyay in ay taageero u ahaayeen ganacsade Xaaji Abuukar Cumar Caddaan oo gacan saar weyn la leh maxkamaha islaamiga ee gopbolka Banaadir

Maleeshiyooyinka isbahasyiga oo xalay oo dhan abaabul xoogan ugu jiray weerar ballaaran oo ay ku qaadaan ciidamo tiro yar oo halkaasi fariisin ka dhigtay ayaa saakay markii uu dilaacay waaga waxa ay weerar ku asteeyeen ciidamo xaafadeedkii barta ciidan ka dhigtay dugsigaasi oo ku hubeysnaa qoryo gacmeedyo, taasoo u fudueysay maleeshiyaadka isbahaysiga oo watay gawaarida dagaalka in ay si fudud kula wareegaan gaca ku haynta deegaankaasi.

Weerarkan gaadmada ah ayaa qaatay qadar saacado ah waxaana inta la og yahay ku geeriyooday 1 qof, 2 kalena waa ay ku dhaawacmeen.

Xaalada deegaanka ayaa iminka waxa ay u muuqataa mid degan, marka laga reebo walaac dadka ay ka qabaan in mar kale ay halkaasi dagaallo ka dhacaan.

Maleeshiyooyinka isbahaysiga ayaa horay uga dalbaday dadka ku dhaqan deegaanka in ay ka saaraan ciidanka lagu xareeyay xarunta dugsiga, balse odayaasha dhaqanka deegaanka ayaa ku jawaabay in ciidanka lagu xareeyay dugsiga ay yihiin dhalinyarada xaafada oo isku abaabulaya sidii ay wax uga qaban lahaayeen ammaan darrida ka jirta deegaanka, waxa ayna hoosta ka xariiqeen in aysan jirin cid ku taageeraysa in ay halkaasi ciidan ku uruuriyaan, marka laga reebo damiirkooda shaqsiyadeed oo u cuntami waayay waxa ka dhacaya xaafadooda.

Maxamed Cadde.
Xafiiska Muqdisho.
RSTV NEWSROOM