RSTV NEWS.Isbahaysiga la dagaalanka argagixisada iyo maxkamada islaamiga oo soo dhaweeyey dadaalada la doonayo in qaboojiyo xiisada labada dhinac ka dhaxaysa.

Isbahaysiga la dagaalanka argagixisada iyo maxkamada islaamiga oo soo dhaweeyey dadaalada la doonayo in qaboojiyo xiisada labada dhinac ka dhaxaysa.

Gudoomiyaha midowga maxaakiimta Islaamiga ah ee gobolka Banaadir Sh.Shariif Sh.Axmed ayaa shaaca ka qaaday in dhankooda ay soo dhaweynayan dadaal kasta oo lagu doonayo in lagu dhameeyo dagaalladii qaraaraa ee maalmihii ugu danbeeyay ku dhexmarayey magaalada Muqdisho.

Guddoomiyaha midowga maxaakimta islaamiga gobolka Banaadir Sh.Shariif Sh.Axmed ayaa soo dhaweeyay dadaalada nabadeed oo ay ku hawlan yihiin maamulka gobolka Banaadir, waxa uuna xaqiijiyay in maxkamadaha islaamiga ay diyaar u yihiin waan waan kasto oo xal loogu raadinayo xiisadaha ka taagan Muqdisho.

“waad ogsiin tihiin maxaakimtu caqabad kuma aysan ahayn dadaalada nabadeed ee xalka loogu raadinayo dhibaatada ka taagan Muqdisho, waxaanu mar kale ku celineynaa in aanu diyaar u nahay waan waan kasto oo nabad looga dhalinayo muqdisho” ayuu yiri Sheekh Shariif oo intaa raaciyay in maxaakimtu qorshihii loo dhisay markii horaba in ay ahayd nabad laga dhiliyo magaalada Muqdisho.

Afhayeenka isbahaysiga argagixiso la dirirka ayaa isagana si taxadir ku jiro usoo dhaweeyay dadaalada nabadeed oo ay wadaan maamulka gobolka Banaadir, isagoo xusay in ay qaadanayaan waan waanta ay ku hawlan yihiin maamulka iyo waxgaradka gobolka Banaadir oo lagu soo afjarayo colaada ka aloosan Muqdisho.

Waan waanta ay wadaan maamulka gobolka Banaadir haddii ay hirgasho waxa ay noqonaysa in ay ku guuleystaan baajinta dagaal mar kale ka dhaca Muqdiho oo dhex mara isbahaysiga iyo maxaakimta oo tiro laba jeer ah ku dagaalamay Muqdisho.

Dadka ku dhaqan magaalada Muqdisho ayaa sidoo kale soo dhaweeyay dadaalada nabadeed oo ay isku xilqaameen waxgarad iyo masuuliyiin ka tirsan maamulka gobolka Banaadir, taasoo lagu baajinayo dagaal mar kale ka qarxa Muqdisho.

Isbahaysiga ayaa soo dhaweeyeen dadaalada nabadeed ee lagu qaboojinayo xiisadaha kala dhaxeeya maxkamadaha islaamiga laakiin waxa uu waantaasi shuruud kaga dhigay haddii aysan ka hor imaaneyn wax uu ku sheegay mabaadii’da isbahaysiga.

Maamulka iyo waxgaradka gobolka Banaadir ayaa wada waan waan xal loogu raadinayo dhiilada colaadeed ee cirka isku sii shareeraysaa, una dhaxeysa maxkamadaha islaamiga ee Muqdisho iyo isbahaysiga la dagaalanka argagixisada, ayadoo waxgaradkaasi indhaweydba shirar ay uga socdeen hotelka Nabada ee Muqdisho, taasoo looga golleeyahay in lagaga hortago dagaal mar kale ka qarxa Muqdisho.

Maxamed Cadde.
Xafiiska Muqdisho.
RSTV NEWSROOM